Üç qadın güləşçimiz mübarizəyə başlayır, Maqomedxan Maqomedov dünya çempionu ola bilər
Bakı, 19 sentyabr, AZƏRTAC
Bu gün Azərbaycanın üç qadın güləşçisi Serbiyanın paytaxtı Belqradda keçirilən dünya çempionatında mübarizəyə başlayacaq.
AZƏRTAC xəbər verir ki, 50 kiloqram çəki dərəcəsində çıxış edən Mariya Stadnik təsnifat mərhələsində Yusneylis Quzmanla qarşılaşacaq.
57 kiloqram çəkidə yarışan Jalə Əliyeva 1/16 finalda kolumbiyalı Andrea Qonzalesi sınağa çəkəcək. 65 kiloqramda mübarizə aparan Birgül Soltanova isə 1/8 finalda türkiyəli Kadriye Aksoyla güləşəcək.
Bu gün, həmçinin 57 kiloqram çəki dərəcəsində yer alan Alyona Kolesnik təsəlliverici qarşılamada macarıstanlı Tamara Dollakla üz-üzə gələcək.
Azərbaycanın sərbəst güləşçisi Maqomedxan Maqomedov isə finalda bəhreynli Axmed Tajudinov mübarizə aparacaq. M. Maqomedov həlledici görüşə vəsiqə qazanmaqla artıq “Paris-2024” Yay Olimpiya Oyunlarına lisenziya əldə edib.
Qeyd edək ki, dünya çempionatında sərbəst güləşçilərimizdən hələlik Osman Nurmaqomedov gümüş medala sahib çıxıb.
Yarışa sentyabrın 24-də yekun vurulacaq.
Bölmənin digər xəbərləri
