“UĞUR” MÜKAFATLARININ TƏQDİMAT MƏRASİMİ KEÇİRİLMİŞDİR
Mərasim Rəşid Behbudovun ifasında “Azərbaycan” mahnısı ilə başlanmışdır. MMTM-in sədri Arif Mədətov ilk dəfə təqdim edilən “Uğur” mükafatı barədə məlumat verərək demişdir ki, o, milli mədəniyyətimizin təbliği, inkişafı və ziyalılarımızın yaradıcı əməyinin qiymətləndirliməsi məqsədi ilə təsis olunmuşdur. Sonra 7 nominasiya üzrə mükafatlar təqdim edilmişdir. “Mədəniyyətin dostu” mükafatına Heydər Əliyev Fondunun prezidenti, YUNESKO-nun xoşməramlı səfiri, Milli Məclisin deputatı Mehriban xanım Əliyeva layiq görülmüşdür. “Sənət və ləyaqətə görə” mükafatları xalq artisti Canəli Əkbərova, tənqidçi, sənətşünaslıq doktoru İlham Rəhimliyə, ədəbiyyat üzrə xalq şairi Fikrət Qocaya, kino və teatr sənəti üzrə rejissor Bəhram Osmanova, musiqi üzrə əməkdar artist Gülüstan Əliyevaya, boyakarlıq üzrə rəssam Tofiq Qəzənfərova verilmişdir. Mərasimdə “Havalansın Xanın səsi...” muğam müsabiqəsinin qalibləri Şəmsəddin İbrahimov, Mirzə Rzaxanzadə və başqaları muğam və təsniflər oxumuşlar. Müğənniləri xalq artistləri Möhlət Müslümov (tar) və Fəxrəddin Dadaşov (kamança) müşayiət etmişlər.
Bölmənin digər xəbərləri
