Ukrayna Milli Bankı qrivnanın məzənnəsini sabit saxlamaq üçün bir milyarddan artıq dollar satıb
Kiyev, 20 yanvar, AZƏRTAC
Ukraynada dollara tələb artmağa davam etdiyi üçün ölkənin Milli Bankı dolların məzənnəsini aşağı salmaq qərarına gəlib.
Bu barədə AZƏRTAC Ukrayna Milli Bankına istinadla məlumat verib.
Milli Bank dolların məzənnəsinin aşağı salınması üçün ötən həftə banklararası valyuta bazarında 1,015 milyard dollar satıb. Bu, əvvəlki həftənin 1,039 milyon dollarından bir qədər azdır.
Qeyd edək ki, ötən ilin dekabrında dollara tələb kəskin artıb və Ukrayna Milli Bankı banklara 5,284 milyard dollar satıb. Bu, rekord aylıq göstəricidir. Ümumilikdə, 2024-cü ildə Milli Bank bazarda 34,822 milyard dollar vəsait satıb. Ötən il Ukraynaya beynəlxalq yardımın həcmi isə 41,7 milyard dollar təşkil edib.
Bundan əlavə, artıq ilin əvvəlindən Ukrayna Rusiyanın dondurulmuş aktivləri vasitəsilə Avropa İttifaqından 3 milyard avro alıb.
Xatırladaq ki, son aylar pul bazarında dolların məzənnəsi bahalaşıb.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
