SİYASƏT
Ukrayna portalı ermənilərin Qarabağda acınacaqlı vəziyyətdə yaşamasından yazıb
Kiyev, 6 yanvar, AZƏRTAC
Ukraynanın “dialog.ua” portalı Azərbaycan Prezidenti İlham Əliyevin Anar Kərimovu mədəniyyət naziri təyin olunması ilə əlaqədar qəbul edərkən çıxışı barədə məqalə yayıb.
AZƏRTAC xəbər verir ki, məqalədə Prezident İlham Əliyevin ermənilərin Qarabağda acınacaqlı vəziyyətdə yaşamasına dair fikirləri yer alıb: “Azad edilmiş torpaqlarda hər tərəf dağıdılıb. Amma bəzi tikililər var, bəzi evlər var ki, orada ermənilər yaşayıb. Adam baxanda məəttəl qalır ki, orada insanlar necə yaşayıblar? Elə bil ki, it damıdır. Ermənistan rejimi bu adamları faktiki olaraq belə səfalət içində, belə yoxsulluq içində girov kimi saxlayaraq məcbur edirdi ki, orada yaşasınlar”.
Yazıda qeyd olunub ki, görüşdə Prezident İlham Əliyev ermənilərin Qarabağda süni məskunlaşdırıldığını və onların saylarının şişirdildiyini bildirib.
Emil Hüseynli
AZƏRTAC-ın xüsusi müxbiri
Kiyev