Ukrayna Prezidentinin səfəri ilə əlaqədar Xirosimada təhlükəsizlik tədbirləri gücləndirilib
Pekin, 21 may, AZƏRTAC
Ukrayna Prezidenti Volodimir Zelenskinin “Böyük Yeddilik” (G7) qrupunun zirvə görüşündə iştirak üçün Yaponiyaya səfəri ilə əlaqədar tədbirin keçirildiyi Xirosima şəhərində təhlükəsizlik tədbirləri daha da gücləndirilib.
AZƏRTAC Yaponiya mediasına istinadla xəbər verir ki, zirvə görüşünə görə şəhərdə təhlükəsizliyin təminatına cəlb edilmiş 24 min nəfərlik heyətə əlavə qüvvələr cəlb olunub. Yaponiya tərəfi mümkün sui-qəsd və ya təxribat ehtimalını əsas götürərək belə qərar qəbul edib.
Qeyd edək ki, mayın 19-da başlayan G7 ölkələrinin liderlərinin zirvə görüşü ilə əlaqədar Xirosimada fövqəladə təhlükəsizlik tədbirləri həyata keçirilir. Bəzi küçələrdə hərəkət bağlanıb, 140 orta məktəbdə tədris, istehsal müəssisələrində iş bir neçə günlüyə dayandırılıb. Sakinlərə fərdi avtomobillərindən mümkün qədər az istifadə tövsiyə olunub. Kommersiya avtomobillərinə isə gecə vaxtı hərəkət qadağan edilib. ABŞ Hərbi Dəniz Qüvvələrinin nüvə mühərrikli təyyarədaşıyan gəmisi “Nimitz” G7 Sammiti zamanı Yaponiya limanında olacaq.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
