UKRAYNA TURİZM SAHƏSİNDƏ AZƏRBAYCANLA ƏMƏKDAŞLIĞI GENİŞLƏNDİRMƏK NİYYƏTİNDƏDİR
Ukrayna Dövlət Turizm İdarəsi Azərbaycanın turizm şirkətləri ilə əməkdaşlığı genişləndirmək niyyətindədir. Bunu idarənin baş direktor müavini, Bakıda keçirilən 3-cü Azərbaycan beynəlxalq turizm və səyahətlər sərgisində iştirak edən Sergey Qrabar AZƏRTAC-ın müxbiri ilə söhbətində bildirmişdir. O demişdir ki, keçmişdə Azərbaycanla Ukraynanın turizm sahəsində sıx əlaqələri olmuşdur. Hazırda strateji tərəfdaşlıq münasibətlərinin bərqərar olduğu bir vaxtda turizm şirkətlərinin qarşısında geniş perspektivlər açılır. Ukraynanın Bakıdakı sərgidə iştirak etməsi digər ölkələrdən olan həmkarlarla danışıqlar aparmasına imkan yaradacaqdır.
