Ukraynalı politoloq: Ukrayna həmişə Azərbaycanın ərazi bütövlüyünün tərəfdarı olub və olacaq
Kiyev, 22 iyul, AZƏRTAC
Ermənistan-Azərbaycan münaqişəsi məsələsində Ukraynanın mövqeyi mübahisəli məqamların beynəlxalq hüquq çərçivəsində həll edilməsinə əsaslanır.
Ukrayna Politoloqlar Assosiasiyasının eksperti Renat Kovbasyuk bu fikri AZƏRTAC-a müsahibəsində söyləyib. O qeyd edib ki, Ermənistan Azərbaycanın ərazilərini işğal edib və Ukrayna həmişə Azərbaycanın ərazi bütövlüyünün tərəfdarı olub və olacaq. Ekspert deyib: “Dünya birliyi, o cümlədən sağlam düşüncəli siyasətçilər çox yaxşı başa düşürlər ki, təcavüzkar məhz erməni tərəfi olub və indi də belədir, Azərbaycan isə yalnız öz suverenliyini qoruyur. Lakin həmin siyasətçilər bəzi səbəblər üzündən bunu açıq bəyan etmir və münaqişəni sülh yolu ilə nizamlamağa çağırırlar”.
Ukraynalı politoloq əmin olduğunu bildirib ki, Azərbaycanın tərkibində Dağlıq Qarabağın erməni əhalisinə heç bir təhlükə yoxdur. R.Kovbasyuk daha sonra deyib: “Azərbaycan dövləti onun ərazisində yaşayan bütün xalqlara hörmət edir və əgər erməni tərəfi bu münaqişənin dinc yolla nizamlanmasını həqiqətən istəyərsə, münaqişə tezliklə həll ediləcək”.
Rüstəm Məmmədov,
Kiyev
Bölmənin digər xəbərləri
