Ukraynanın Azərbaycandakı səfiri Binəqədi Rayon İcra Hakimiyyətində olmuşdur
Bakı, 31 oktyabr (AZƏRTAC). Xəbər verildiyi kimi, oktyabrın 27-də Bakıda Azərbaycan Respublikası Səmti Müəyyən Etmə İdman Federasiyasının (SMEF) təşkilatçılığı və Binəqədi Rayon İcra Hakimiyyətinin təşkilati dəstəyi ilə səmti müəyyən etmə idman növü üzrə açıq respublika çempionatının açılış mərasimi keçirilmişdir.
AZƏRTAC xəbər verir ki, çempionatda qalib gələn komandanın rəhbəri, Ukraynanın Azərbaycandakı səfiri Aleksandr Mişenko və SMEF-in prezidenti Mirəli Kazımov Binəqədi Rayon İcra Hakimiyyətində olmuşlar.
Rayon icra hakimiyyətinin başçısı Xaləddin İsgəndərovla görüşdə A.Mişenko və M.Kazımov çempionatın təşkilində göstərilən dəstəyə görə minnətdarlıqlarını bildirmişlər.
Görüşdə bildirilmişdir ki, yeni yaranmasına baxmayaraq səmti müəyyən etmə idman növü qısa müddətdə yeniyetmələrin və gənclərin marağına səbəb olmuşdur.
Ukraynalı səfir özünün də bu idman növünə marağından danışaraq SMEF ilə mütəmadi əlaqədə olduğunu, tədbirlərdə fəal iştirak etdiyini və bu idmanın yeniyetmələrin hərbi vətənpərvərlik ruhunda tərbiyə olunmasında, onlarda çətin məqamlarda dərhal və məntiqə əsaslanan qərarlar qəbul etmək vərdişlərinin formalaşmasında mühüm rol oynadığını vurğulamışdır.
Tərəflər Binəqədi rayonunda da bu idman növünün təbliği və inkişaf etdirilməsi ilə bağlı fikir mübadiləsi aparmışlar.
Qonaqlar, həmçinin Binəqədi Rayon İcra Hakimiyyətinin inzibati binasında elektron hökumətə keçidlə əlaqədar yaradılmış texniki imkanlar və iş şəraiti ilə tanış olmuşlar.
Bölmənin digər xəbərləri
