Ukraynanın XİN başçısı ABŞ Dövlət katibi ilə ölkənin NATO-ya üzvlüyünü müzakirə edib
Vaşinqton, 10 iyul, AZƏRTAC
ABŞ Dövlət katibi Antoni Blinken və Ukraynanın xarici işlər naziri Dmitro Kuleba NATO Sammiti çərçivəsində Vaşinqtonda görüşüblər.
AZƏRTAC-ın Dövlət Departamentinə istinadən verdiyi məlumata görə, görüşdə Ukraynanın NATO üzvlüyünə daha da yaxınlaşması istiqamətində görülən işlər, Rusiya ilə müharibədə Ukraynanın müdafiə qabiliyyətini gücləndirmək istiqamətində ABŞ-ın dəstəyi və Ukraynanın Trans-Atlantik inteqrasiyası üçün vacib islahatlar barədə müzakirə aparılıb.
Tərəflər Ukraynanın hava müdafiəsini gücləndirməklə bağlı müttəfiq ölkələrin atdığı yeni addımlar barədə danışıblar. Həmçinin görüşdə enerji təhlükəsizliyi və Ukraynanın enerji sisteminin dayanıqlığını artırmaq üçün G7+ çərçivəsində davam edən səylər müzakirə edilib. Dövlət katibi ABŞ-ın Ukraynanın suverenliyi, müstəqilliyi və ərazi bütövlüyünü dəstəklədiyini bir daha vurğulayıb.
Məlahət Nəcəfova
AZƏRTAC-ın xüsusi müxbiri
Vaşinqton
Bölmənin digər xəbərləri
