Ulu Öndər Heydər Əliyev elm və təhsilin inkişafında mühüm rol oynayıb
Bakı, 8 may, AZƏRTAC
Mayın 8-də Elm və Təhsil Nazirliyinin Kimya İnstitutunda Ümummilli Lider Heydər Əliyevin anadan olmasının 103-cü ildönümünə həsr olunmuş tədbir keçirilib.
Bu barədə AZƏRTAC-a institutdan məlumat verilib.
Əvvəlcə Heydər Əliyevin Azərbaycan Respublikasının inkişafındakı fəaliyyəti və zəngin dövlətçilik irsinə həsr olunmuş videoçarx nümayiş etdirilib.
Tədbirdə institutun direktoru səlahiyyətlərini icra edən professor Əfsun Sucayev Ulu Öndər Heydər Əliyevin Azərbaycan xalqı qarşısındakı əvəzsiz xidmətlərdən danışıb. O bildirib ki, ölkəmizdə ictimai-siyasi sabitliyin yaranması, respublikamızın nail olduğu yüksək iqtisadi inkişaf, o cümlədən yüzlərlə məhsul istehsal edən kimya sənayesinin inkişafı Ümummilli Liderin adı ilə bağlıdır. Ulu Öndər hələ 1969-cu ildə Azərbaycanda hakimiyyətə gələndə neft-kimya sənayesinin inkişafına xüsusi diqqət ayırıb, məhz həmin illərdə Sumqayıtda kimya sənayesinin inkişafı, yeni müəssisələrin yaradılması, mövcud istehsalatın müasirləşdirilməsi sahəsində işlər xeyli sürətlənib. Heydər Əliyev müasir Azərbaycan dövlətçiliyinin formalaşmasında olduğu kimi, elm və təhsilin inkişafında da mühüm rol oynayıb. Onun təşəbbüsü ilə elmi-tədqiqat institutları yaradılıb, ali təhsil müəssisələri modernləşdirilib və təhsil sistemində əsaslı islahatlar aparılıb. 1969-1982-ci illərdə beş yeni ali təhsil müəssisəsi açılıb və ali məktəb tələbələrinin sayı 70 mindən 100 minədək artıb. Heydər Əliyevin təşəbbüsü və himayəsi sayəsində 1970-ci ildən başlayaraq hər il gənclər SSRİ-nin nüfuzlu ali məktəblərində təhsil almağa göndərilib. Həmin dövrdə Sovet İttifaqının 170-dən çox nüfuzlu ali məktəbində 250-dən çox ixtisas üzrə 15 mindən artıq azərbaycanlı gəncin təhsil almasına şərait yaradılıb. Bu isə respublikanın milli kadr potensialının daha da gücləndirilməsində mühüm rol oynayıb. Müstəqillik illərində bütün sahələr kimi elm və təhsil sahəsi də daim Ulu Öndərin diqqət mərkəzində olub, bu istiqamətdə bir sıra qanunlar qəbul edilib, islahatlar aparılıb.
Professor çıxışında Ulu Öndərin siyasi kursunu uğurla davam etdirən Prezident İlham Əliyev tərəfindən həyata keçirilən uğurlu siyasət nəticəsində ölkəmizin ərazi bütövlüyünün bərpa olunduğunu, ictimai-siyasi sabitliyin və əmin-amanlığın daim qorunduğunu, əhalinin sosial rifahının yüksəldilməsinin dövlətin siyasətində xüsusi istiqamət olduğunu vurğulayıb.
Tədbirdə dosent Faiq Məmmədov, Həmkarlar Təşkilatının sədri dosent Vüsalə Məcidzadə, elmi işçi Nəzakət Əliyeva, beynəlxalq əlaqələr sektorunun əməkdaşları Araz Dövlətov və Natiq Salahov Heydər Əliyevin Azərbaycan dövlətçiliyinin möhkəmləndirilməsindəki rolundan, elm və təhsil, gənclər siyasətindən, Azərbaycan xalqı qarşısında misilsiz xidmətlərindən danışıblar.
Bölmənin digər xəbərləri
