Ulu öndər Heydər Əliyev metallurgiyanın inkişafına daim dəstək verirdi
Bakı, 3 oktyabr (AZƏRTAC). Oktyabrın 3-də “Azərbaycan Polad İstehsalı Kompleksi” Qapalı Səhmdar Cəmiyyətinin mərkəzi binasında ümummilli lider Heydər Əliyevin 1993-cü il oktyabrın 3-də ilk dəfə Azərbaycan Respublikasının Prezidenti seçilməsi münasibətilə tədbir keçirilib, Ulu Öndərin büstü və xatirə guşəsi açılıb.Cəmiyyətdən AZƏRTAC-a bildiriblər ki, büstün açılış mərasimində çıxış edən cəmiyyətin sədri Samir Cəfərov müasir müstəqil Azərbaycan dövlətinin memarı və qurucusu ümummilli lider Heydər Əliyevin misilsiz xidmətlərindən danışıb, iqtisadiyyatın, elm və təhsilin, mədəniyyətin inkişafına, yüksək ixtisaslı milli kadrların hazırlanmasına göstərdiyi diqqət və qayğıdan söz açıb. Qeyd olunub ki, Ulu Öndər bütün həyatını doğma xalqına, onun xoşbəxtliyinə, firavan gələcəyinə həsr edib. Azərbaycanın müasir tarixinin böyük, eyni zamanda şərəfli bir dövrü onun adı ilə bağlıdır.
S.Cəfərov deyib ki, dahi şəxsiyyət Heydər Əliyev metallurgiyanın iqtisadiyyatın mühüm tərkib hissələrindən biri olduğunu nəzərə alaraq bu sahənin inkişafına daim dəstək verir, xüsusən müstəqillik illərində metallurgiya ilə bağlı yeni istehsal müəssisələrinin yaradılmasını diqqət mərkəzində saxlayırdı. Bu gün həmin siyasi xətt Prezident İlham Əliyev tərəfindən uğurla davam etdirilir. Ölkəmizin beynəlxalq nüfuzu getdikcə artır, sosial-iqtisadi sahədə böyük irəliləyişlər əldə edilir. Dövlətimizin başçısının 2014-cü ili “Sənaye ili” elan etməsi, bu çərçivədə güclü metallurgiya sənayesinin yaradılması qarşımızda yeni üfüqlər açır.
Sonra tədbir iştirakçıları xatirə guşəsi ilə tanış olublar.
Bölmənin digər xəbərləri
