Batumi, 15 may, AZƏRTAC

Azərbaycan Xalq Cümhuriyyətinin yaranmasının 100 və ulu öndər Heydər Əliyevin anadan olmasının 95 illik yubileyi münasibətilə Gürcüstanın Batumi şəhərində təntənəli mərasim keçirilib.

AZƏRTAC xəbər verir ki, Azərbaycanın Batumidəki baş konsulluğunun təşkil etdiyi tədbirdə Acarıstan Muxtar Respublikası hökumətinin rəhbəri Zurab Pataradze, nazirlər, hökumət rəsmiləri, Türkiyə, İran və digər ölkələrin baş konsulları və konsulluq şöbələrinin əməkdaşları, Azərbaycan və gürcü ictimaiyyətinin nümayəndələri iştirak ediblər.

Əvvəlcə Azərbaycanın və Gürcüstanın dövlət himnləri səsləndirilib.

Azərbaycanın Batumidəki baş konsulu Pərviz İsmayılzadə çıxış edərək Azərbaycan Xalq Cümhuriyyətinin yaranması və qısa vaxt ərzində qazandığı uğurlar barədə ətraflı məlumat verib. Bildirib ki, Şərqdə ilk dəfə qadınlara seçki hüququ verən Azərbaycan Xalq Cümhuriyyəti ən demokratik dövlət kimi adını tarixə yazdırıb. Diplomat qeyd edib ki, tarixən qonşu Gürcüstan və Azərbaycan eyni vaxtda müstəqil dövlət qurublar. İlk müstəqilliyimiz də demək olar ki, eyni vaxtda süqut edib. Buna baxmayaraq, hər iki xalq uzun illər keçdikdən sonra müstəqilliklərini bərpa edib. Dostluğumuz, qardaşlığımız bundan sonra da inkişaf edib, daha da möhkəmlənib.

Ümummilli lider Heydər Əliyevin mənalı həyatı və çoxşaxəli fəaliyyəti ilə bağlı ətraflı məlumat verən diplomat deyib ki, dövlət müstəqilliyimizin qorunması və inkişafı Heydər Əliyevin adı ilə bağlıdır. Müstəqilliyin bərpasının ilk illərində Azərbaycanın çətin böhrandan çıxmasında, gənc respublikanın möhkəmlənməsində və dünyada tanınmasında Ümummilli Liderin müstəsna xidmətləri olub. Ulu öndər Heydər Əliyev Azərbaycanda milli birlik yaradıb, ölkənin regionda aparıcı dövlətə çevrilməsi üçün mühüm addımlar atıb. Ümummilli Liderin siyasi xətti və dövlətçilik irsi bu gün Prezident İlham Əliyev tərəfindən uğurla davam etdirilir. Ulu Öndərin müəllifi olduğu Bakı-Tbilisi-Ceyhan neft, Bakı-Tbilisi-Ərzurum qaz, Bakı-Tbilisi-Qars dəmir yolu layihələri Azərbaycanın və Gürcüstanın regionda aparıcı dövlətlər olmasında, iqtisadi inkişafında, dünyada mövqelərinin möhkəmlənməsində mühüm rol oynayır.

Azərbaycanın müstəqillik illərində, xüsusən də Prezident İlham Əliyevin hakimiyyətdə olduğu dövrdə qazandığı uğurlardan bəhs edən diplomat deyib: “Prezident İlham Əliyevin praqmatik və uzaqgörən siyasəti nəticəsində Azərbaycan dünyada təkcə neft ölkəsi kimi deyil, həm də idman, multikultural dəyərlərə malik, tolerant dövlət kimi tanınır. Azərbaycan Prezidenti İlham Əliyevin, eləcə də Birinci vitse-prezident Mehriban Əliyevanın təşəbbüsləri ilə Bakıda yüksək səviyyədə keçirilən “Eurovision” mahnı müsabiqəsi, “Bakı-2015” birinci Avropa Oyunları, 42-ci Ümumdünya Şahmat Olimpiadası, IV İslam Həmrəyliyi Oyunları, multikulturalizm və humanitar forumlar buna parlaq nümunədir”.

P.İsmayılzadə Azərbaycan-Gürcüstan münasibətlərinin inkişafına nəzər salıb, ölkələrimiz arasında əlaqələrin strateji tərəfdaşlıq səviyyəsinə yüksəldiyini xüsusi qeyd edib. Baş konsul Naxçıvan və Batumi şəhərlərinin qardaşlaşmasını, Azərbaycanın və Gürcüstanın bölgələri arasındakı yüksək səviyyəli münasibətlərin bunun bariz nümunəsi olduğunu vurğulayıb.

Acarıstan Muxtar Respublikası hökumətinin rəhbəri Zurab Pataradze çıxışında Azərbaycan xalqını hər iki əlamətdar hadisə münasibətilə təbrik edib. O deyib ki, Azərbaycan ilə Gürcüstan qonşu, dost və qardaş respublikalardır. Azərbaycan xalqı bu günlər ilk müstəqil dövlət quruculuğunun 100 illiyini və dünya şöhrətli siyasi xadim, gürcü xalqının da yaxın dostu Heydər Əliyevin anadan olmasının 95-ci ildönümünü qeyd edir. Biz də bu bayramları azərbaycanlılarla birgə qeyd edirik. Bu, bizim dostluğumuzun nümunəsidir.

“Bu gün münasibətlərimiz strateji tərəfdaşlıq səviyyəsindədir. Mən əlaqələrimizin bu səviyyəyə çatmasında tarixi şəxsiyyətlərimizin, xüsusən də Heydər Əliyevin adını çəkməyə bilmərəm. Məhz Heydər Əliyevin səyi nəticəsində regionda irimiqyaslı Bakı-Tbilisi-Qars, Bakı-Tbilisi-Ərzurum, Bakı-Tbilisi-Qars irimiqyaslı layihələr uğurla həyata keçirilir. Bu layihələr ölkələrimizin dövlət müstəqilliyinin möhkəmlənməsində, iqtisadi, mədəni, humanitar sahələrdə inkişafına töhfələr verir”, - deyə Z.Pataradze bildirib.

O, regionda həyata keçirilən beynəlxalq iqtisadi layihələrin əhəmiyyətindən də bəhs edib.

Tədbirdə ulu öndər Heydər Əliyevin həyat və fəaliyyəti ilə bağlı sənədli film nümayiş olunub.

Azərbaycanın və Gürcüstanın incəsənət ustaları mərasimdə maraqlı konsert proqramları ilə çıxış ediblər.

Tədbirdən sonra jurnalistlərə müsahibə verən Z.Pataradze deyib: “Azərbaycan-Gürcüstan dostluğu barədə çox danışmaq olar. Bəzi görkəmli şəxsiyyətlər ölkələrimizin qarşılıqlı siyasi, mədəni və iqtisadi əlaqələrinin inkişafı sahəsində çox böyük işlər görüblər. Qeyd etməliyəm ki, bütün nailiyyətlərimizin səbəbi Heydər Əliyevdir. O, ölkələrimiz arasındakı əlaqələrin inkişafı sahəsində çox böyük işlər görüb. Bu gün də ölkələrimiz arasındakı siyasi münasibətlər dinamik inkişaf edir. Bugünkü bayram tədbirində hər iki ölkənin incəsənət ustaları bir daha göstərdilər ki, biz təkcə iqtisadiyyatda deyil, musiqi sahəsində də bir-birimizə çox bağlıyıq”.

Hökumət başçısı Batumidə fəaliyyət göstərən Azərbaycan diaspor təşkilatlarının rolunu yüksək qiymətləndirib.

Acarıstan Muxtar Respublikasının təhsil, mədəniyyət və idman naziri İnqa Şamilişvili jurnalistlərə müsahibəsində deyib: “Bu gün biz azərbaycanlılarla birlikdə iki böyük bayramı qeyd edirik. Acarıstan hökuməti və acar xalqı adından Azərbaycan xalqını təbrik edirəm. Bizim təhsil, turizm, idman və iqtisadi sahələrdə əlaqələrimiz uğurla inkişaf edir. Biz bu münasibətləri daha da genişləndirmək niyyətindəyik. İnanıram ki, xalqlarımız arasındakı dostluq əlaqələri daha geniş inkişaf edəcək”.

İran İslam Respublikasının Batumidəki baş konsulu Ahmad Badpa da Azərbaycan xalqını təbrik edərək bildirib: “Azərbaycan bizim yaxın qonşumuz və dostumuzdur. Bu gün Batumidə belə bir tədbirin keçirilməsindən və burada iştirakımızdan çox məmnunam. Müstəqil Azərbaycan dünyada tanınan və öz sözünü deyən ölkədir. Azərbaycanın belə qüdrətli ölkə olmasında Heydər Əliyevin rolu çox böyükdür. Belə bir tarixi şəxsiyyətin yubileyində iştirakdan çox məmnunam. İnanıram ki, bizim qardaşlıq və dostluq əlaqələrimiz bundan sonra da bütün sahələrdə inkişaf edəcək və biz birlikdə çox böyük işlər görəcəyik”.

Xətayi Əzizov

AZƏRTAC-ın xüsusi müxbiri

Batumi