ÜMUMDÜNYA ƏQLİ MÜLKİYYƏT TƏŞKİLATI VƏ RESPUBLİKA MÜƏLLİF HÜQUQLARI AGENTLİYİ BAKIDA BEYNƏLXALQ SEMİNAR KEÇİRİRLƏR
Agentliyin sədri Kamran İmanov tədbiri açaraq bildirmişdir ki, seminarda əqli mülkiyyət hüquqlarının qorunması, Azərbaycanda folklor nümunələrinin qorunması təcrübəsi, əqli mülkiyyətə əsaslanan sənayenin iqtisadi əhəmiyyəti və s. məsələlər müzakirə olunacaqdır. Seminarda ÜƏMT-in yüksək vəzifəli təmsilçiləri, Rusiya Dövlət Əqli Mülkiyyət İnstitutunun, Türkiyə Müəllif Hüquqları Baş Müdirliyinin rəhbərləri, İsveçrə, Böyük Britaniya, Gürcüstan, Qazaxıstan və Qırğızıstanın əqli mülkiyyət sahəsində tanınmış mütəxəssislər iştirak edirlər. Sədr xüsusi vurğulamışdır ki, belə nüfuzlu seminarın Bakıda keçirilməsi artıq Azərbaycanda əqli mülkiyyət təsisatının prioritet sahələrdən birinə çevrildiyini, bu istiqamətdə beynəlxalq əlaqələrimizin getdikcə genişləndiyini göstərir. Ümummilli liderimiz Heydər Əliyevin yaratdığı müəllif hüququ təsisatının inkişafını təmin etmək məqsədi ilə ölkəmizdə zəngin qanunvericilik bazası yaradılmış, Agentliyin yeni Əsasnaməsi təsdiq edilmişdir. MDB məkanında müəlliflik hüququ və əlaqəli hüquqlar obyektlərinin qeydiyyat sistemi ilk dəfə Azərbaycanda tətbiq olunmuşdur.
Nazirlər Kabineti Aparatının Elm, mədəniyyət, xalq təhsili və sosial problemlər şöbəsinin müdiri İsmayıl Sadıqov Baş nazir Artur Rasizadənin seminar iştirakçılarına təbrik məktubunu oxumuşdur.
ÜƏMT-in Kreativ sənaye departamentinin direktoru Dimiter Qantçev iştirakçılara təşkilatın baş direktoru Kamil İdrisin salamlarını yetirmiş, seminara uğurlar arzulamışdır.
Sürix Universitetinin (İsveçrə) professoru Nacib Fərabi “Əqli mülkiyyət və kreativ sənaye: yaradıcılıq sektorunun iqtisadiyyatı”, Dimiter Qantçev “Müəlliflik hüququna əsaslanan sənayeyə iqtisadi yatırımın (sərmayənin) qiymətləndirilməsində ÜƏMT-nin təcrübəsi” mövzularında məruzə etmişlər.
Kreativ sənayenin dəyərləndirilməsində təcrübə mübadiləsi aparılmışdır. Lids Universitetinin (Böyük Britaniya) professoru Kelvin Teylorun, bir sıra ərəb ölkələrinin təcrübəsi barədə professor Nacib Fərabinin məruzələri dinlənilmişdir.
Kamran İmanovun kreativ sənaye və əqli mülkiyyət hüququ sahəsində Azərbaycanın təcrübəsinə həsr olunmuş məruzəsi maraqla qarşılanmışdır.
Fasilədən sonra Kelvin Teylor və Nacib Fərabi, ÜƏMT-in Kreativ sənaye departamentinin proqram rəhbəri Florense Rocal müxtəlif mövzularda məruzə etmişlər.
Kamran İmanov Azərbaycanda ənənəvi mədəniyyət nümunələrinin (folklorun) qorunması təcrübəsindən danışaraq demişdir ki, MDB məkanında və Şərqi Avropada folklorun hüquqi qorunması haqqında qanun ilk dəfə ölkəmizdə qəbul edilmişdir. Beynəlxalq ictimaiyyətin folklor nümunələrinin qorunması və saxlanması məqsədlərinə diqqətinin artdığı, bununla birlikdə, bu sahədə məsələləri tənzimləyən beynəlxalq hüquqi qorunma alətinin olmadığı bir şəraitdə “Azərbaycan folkloru nümunələrinin hüquqi qorunması haqqında” Qanunun böyük əhəmiyyəti vardır. Bu qanunun qəbulu ilə folklor nümunələrimizin və folklor nümunələri əsasında yaranmış müəllif əsərlərinin, xüsusən ermənilər tərəfindən mənimsənilməsi, özgəninkiləşdirilməsi və təhrif olunması hallarının qarşısının alınması istiqamətində bir sıra tədbirlər, o cümlədən təsirli hüquqi addımlar atılır.
Agentliyin sədri bildirmişdir ki, yayım təşkilatlarının verilişlərində və müxtəlif nəşrlərdə folklor nümunələrindən istifadə olunarkən Qanunun tələblərinə riayət olunub-olunmamasını müəyyənləşdirmək üçün qurum tərəfindən müntəzəm monitorinqlər keçirilmişdir. Bu işlər Agentlikdə hazırlanmış və təsdiq olunmuş “Folklor nümunələrindən istifadə qaydaları haqqında” Təlimata uyğun aparılmışdır. Adıçəkilən Qanunun qüvvəyə minməsi ilə bağlı dövlət başçısı tərəfindən Agentliyə müvafiq səlahiyyətlər verilməsi nəticəsində folklor nümunələrinə hüquqların müdafiəsi sahəsində hüquqi və inzibati imkanlar genişlənmişdir. Azərbaycan folklorunun son iki yüz ildə ermənilər tərəfindən qarət və talanlara məruz qalması xalqımızı narahat edir. Ermənilər Azərbaycan musiqisi, rəqsləri və kompozisiyalarını saxtakarlıqla öz adlarına çıxır, kaset və SD vasitəsilə yayırlar. Bununla əlaqədar folklorun qorunmasına dair məsələlər Agentlik tərəfindən müxtəlif səviyyələrdə müzakirəyə çıxarılmışdır. Beynəlxalq əməkdaşlıq çərçivəsində bir sıra ölkələrin müvafiq orqanlarının, beynəlxalq strukturların diqqəti Azərbaycan folkloru nümunələrinin ermənilər tərəfindən mənimsənilməsi ilə bağlı problemə yönəldilmişdir. Ermənilərin konkret oğurluqları barədə ÜƏMT rəhbərliyinə dəfələrlə məktub göndərilmiş, bu cür halların qarşısının alınmasında Azərbaycana kömək göstərilməsi xahiş olunmuşdur.
Folklor nümunələrinin qorunmasına aid beynəlxalq Konvensiyanın qəbul edilməsinə dair ÜƏMT-in apardığı müzakirələrin Azərbaycanda böyük maraqla izlənildiyini bildirən Kamran İmanov məlumat vermişdir ki, Agentliyin saytı açılmış və burada yerləşdirmək üçün Azərbaycan folkloru nümunələrinin qorunması işinin tərkib hissəsi kimi xüsusi multimedia materialı hazırlanmışdır.
Sonra seminarda “dəyirmi masa” ətrafında müzakirələr aparılmışdır.
Seminar iyunun 8-də öz işini davam etdirəcəkdir.
Bölmənin digər xəbərləri
