Ümumdünya Şahmat Olimpiadasının açılış mərasimin keçiriləcəyi məkan yaxın günlərdə təsdiqlənəcək
Bakı, 15 aprel, AZƏRTAC
Bakı Şahmat Olimpiadası Əməliyyat Komitəsinin direktoru, Azərbaycan Şahmat Federasiyasının vitse-prezidenti Mahir Məmmədov Bakıda keçiriləcək 42-ci Ümumdünya Şahmat Olimpiadasına hazırlıq işləri ilə bağlı Bakı Şahmat Olimpiadası Əməliyyat Komitəsinin mətbuat xidmətinə müsahibə verib. AZƏRTAC müsahibəni təqdim edir.
- Əvvəlcə FİDE rəsmilərinin Bakıya səfəri haqda danışmaq istərdik. Beynəlxalq Şahmat Federasiyasının nümayəndələri ilə hansı məsələlər müzakirə edildi?
- FİDE prezidenti vəzifəsini icra edən Georgios Makropulosun rəhbərlik etdiyi nümayəndə heyəti ilə bir sıra vacib məsələləri müzakirə etdik. Olimpiadanın keçiriləcəyi Crystal Hall-da olduq. Qonaq komandaların məskunlaşacağı otellərlə əməkdaşlıq memorandumu imzalandı. Görülən işlərlə bağlı hesabat verildi. Əməliyyat Komitəsi ilə FİDE rəsmilərinin görüşündə qonaqların viza məsələsi, olimpiadanın açılış və bağlanış mərasimi, hakim və şahmatçıların qarşılanması və yerləşdirilməsi və digər mühüm məsələlər barədə fikir mübadiləsi aparıldı.
- Bu günədək Bakı Şahmat Olimpiadası Əməliyyat Komitəsinin gördüyü işləri necə qiymətləndirirsiniz?
- Ümumdünya Şahmat Olimpiadasının yüksək səviyyədə təşkil olunması üçün xeyli iş görülüb. Təşkilati işlər plan üzrə davam edir. Olimpiadaya hazırlıq həlledici mərhələyə qədəm qoyur. Bundan sonra FİDE rəsmiləri hər ay Azərbaycan paytaxtına səfər edəcək, görülən işlərlə yerində tanış olacaqlar. Bu günə qədər Əməliyyat Komitəsində bütün departamentlər təsdiqlənib. Yarışın harada və necə keçiriləcəyi dəqiqləşib. Arenada media mərkəzi, VİP sektor və digər yerlərin bölgüsü olunub. Hazırda 42-ci Şahmat Olimpiadasının açılış və bağlanış mərasimlərinin ssenarisi hazırlanır.
- Yeri gəlmişkən, olimpiadanın açılışı harada keçiriləcək?
- Bununla bağlı tender elan olunub. Artıq mərasimi təşkil edəcək şirkətlə bağlı tenderin qalibi məlumdur. Onlar tərəfindən bizə iki arena təklif edilib. Hələlik son qərar verilməyib. Açılış və bağlanış mərasimində yerli mütəxəssislərin təcrübəsindən istifadə olunacaq. Qonaqlara Azərbaycanın mədəni irsini nümayiş etdirmək istəyirik. Yaxın günlərdə mərasimin keçiriləcəyi məkan təsdiqlənəcək.
- Mötəbər yarışda iştirak etmək üçün Bakıya çoxsaylı qonaqlar və iştirakçılar gələcək. Onların viza məsələsi necə həll olunacaq?
- İlk gündən Gənclər və İdman nazirliyi bizə yaxından kömək edir. Viza məsələsində nazirliyin təcrübəsindən istifadə olunacaq. Qonaqların rahat şəkildə viza alması məsələsi müzakirə edilib. Fikrimcə, bu məsələdə heç bir problem olmayacaq.
- Turnir zamanı təhlükəsizlik məsələsi necə olacaq? Yəqin bu məsələ də diqqətdədir.
- Müvafiq orqanlarla danışıqlar gedir. Yarış zamanı təhlükəsizliyin yüksək səviyyədə olması üçün lazımi işlər görülür. 2015-ci ildə Bakı şahmat üzrə Dünya Kubokunu yüksək səviyyədə təşkil etdi. Bu dəfə ölkələrin və şahmatçıların sayı daha çoxdur. Olimpiadada 175-dən çox ölkə iştirak edəcək. Ona görə də gücləndirilmiş təhlükəsizlik tədbirləri görüləcək.
- Azərbaycan yığmalarının hazırlıq planı barədə məlumat verərdiniz. Komandaların heyətləri nə vaxt açıqlanacaq?
- Bu məsələ Azərbaycan Şahmat Federasiyasının diqqətindədir. Bildiyiniz kimi, həm kişilər, həm də qadınlar arasında 3 komanda ilə təmsil olunacağıq. Artıq yığmaların kapitanları və hazırlıq planı dəqiqləşib. Komandalar təlim-məşq toplanışında iştirak edəcək. Tezliklə yığmalarımızın heyəti mətbuata açıqlanacaq.
Bölmənin digər xəbərləri
