ÜMUMMİLLİ LİDERİMİZ HEYDƏR ƏLİYEVİN DOSTU XANIŞ ŞAHIYEVLƏ GÖRÜŞ
Azərbaycan Prezidenti İlham Əliyev sentyabrın 8-də Lerik rayonuna səfəri zamanı ümummilli liderimiz Heydər Əliyevin yaxın dostu Xanış Şahıyevə baş çəkdi. Xanış kişi Prezident İlham Əliyevi və ailə üzvlərini böyük hörmət və mehribanlıqla qarşıladı.
XANIŞ ŞAHIYEV bu diqqətə görə dövlətimizin başçısına ürəkdən minnətdarlıq edərək dedi:
- Mən, həmişə demişəm, indi də deyirəm, gələn yollarınıza qurban olum. Mənim 76 yaşım var. Heydər Əliyev kimi, İlham kimi adamlar görməmişəm. Gözəl ad daşıyan, hörməti olan adamlar həyatda çoxdur. Amma onlardan da gözəli kimdir? Gözəl ölkələrdə, gözəl cəmiyyətdə gözəl danışan. Kim idi o gözəl adı daşıyan? Prezident Heydər Əliyev! Biri Həzrəti Əliyə deyir ya Əli, mən səni çox istəyirəm. Həzrəti Əli deyir ki, mən də istəyirəm. Biri o tərəfdən deyir ya Əli, mən də səni çox istəyirəm. Həzrəti Əli cavabında deyir ki, mən istəmirəm. Həmin adam soruşur ki, nəyə görə? Həzrəti Əli deyir ki, onun istəməyi mənim qəlbimdə sevinc doğurur, sənin istəməyin isə kədər.
“İlham” sözü ruh verən, yüksək ruh coşğunluğu deməkdir. Ailəsinə baxın - gözəl adı Mehriban xanım. Televizorda hamımız, uşaqlar da, biz də görürük uşaqları necə öpür, onları necə bağrına basır.
Hörmətli Prezident, 400-500 qoyun-quzum var. Bir mənəm, bir də arvadımdır. Mənim işimin bir saatını 100 dəfə deməkdənsə, bir dəfə görmək yaxşıdır. Xalqın qarşısında deyirəm ki, zirəklikdə ikinci bir Xanış Şahıyev yoxdur. Təkcə Miri Qənbərovu deyə bilərəm ki, bəli, 91-ci ildən bu yana çox iş görüb, o, bir az məndən üstündür. Mən bu cür zəhmət çəkirəm, bax, bu mənim əllərim. 400-500 qoyunu 10 nəfərlik ailə bir qış saxlaya bilməz. Hörmətli Prezident, bunu həmişə demişəm, əlimin qabarını görəndə başqasının belinin, gözünün, ürəyinin qabarını görürəm.
Hörmətli Prezident, Avropada böyük təşkilatın büro üzvü oldun, sədrin müavini seçildin. İlhamın başına dönüm, Azərbaycan xalqına, Prezident Əliyevə sübut elədi ki, bəli, belə atanın belə oğlu var. İdman sahəsində də Azərbaycanı bəşəriyyətə tanıtdırdı. Prezidentimizin ən axırıncı sözü nə oldu? Cəmiyyəti bəzi-bəzi adamların, müxalifətin, kimin-kimin ümidinə saxlamadı. Seçkilərdə çox adamlar dedi ki, belə eləyərəm -elə eləyərəm. Amma mən həmişə demişəm, camaat da bilir, sənin vədələrinin biri də kənarda qalmayıb. Lerik özünün tarixində Prezidentin üzünü görməyib. Keçmişdə bir dəfə Bağırov buraya gəlib, bir neçə kəndi köçürdü. Zirək kişi kimi mən deyirəm ki, sənin tayın yoxdur. Bir il Qurban bayramında gəlmədim, Heydər Əliyev zəng elədi ki, nə olub? İki uşağım şəhid olub, mən onlar üçün ağlamamışam. Ancaq hər iki gündən bir kasetə baxmasam, ona ağlamasam, başımda papaq gəzdirmərəm. Bunu o qazanıb.
İLHAM ƏLİYEV: Sağ ol, Xanış əmi, çox sağ ol. Sən atamın da qardaşı olmusan, siz çox yaxın olmusunuz. Mən o günləri xatırlayıram, gəlirdin Bakıya, görüşürdün. O gözəl xatirələr hamısı mənim üçün əzizdir. Yadımdadır, özü demişdi ki, gələcəyəm Lerikə, sənin qonağın olacağam. Allah nəsib etmədi. Amma onun yerinə mən gəlmişəm sənin yanına. Çox şadam ki, səni belə gümrah görürəm. Həmişə belə möhkəm olmusan, həmişə haqq sözünü demisən, bir sifətin olub. Həmişə vətənpərvər olmusan, Azərbaycan dövlətinin müstəqilliyinə töhfələr vermisən. Bu təsadüfi deyil ki, Heydər Əliyev səni özünə dost seçib. Azərbaycanda 8 milyon adam var, onların da yarısı kişidir. Onların içərisində az adam tapılardı ki, dost deyərdi, onlardan da biri sənsən. Bu, həqiqətdir. Mən də buraya ürəklə gəlmişəm. Mən demişdim ki, Lerikə mütləq gələcəyəm. Özü də əliboş gəlməmişəm, yol çəkdirib gəlmişəm. Lənkərandan Lerikə qədər yeni müasir, yol salınıb ki, camaat əziyyət çəkməsin, rahat gəlsin, getsin. Çünki mənə demişdilər ki, yol bərbad vəziyyətdədir, gəlib-getmək çətindir, çala-çuxurdur. Bundan sonra başqa işlər olacaq, inkişaf olacaq. Ən əsası odur ki, ürək təmiz olsun, qəlb təmiz olsun. Adam, necə deyərlər, öz hərəkətlərinə məsuliyyət daşısın və sözlə əməl arasında birlik olsun. Bu, atamın yoludur, onun mövqeyidir, mənim də yolumdur. Mən bir xatirə fotoalbomu gətirdim. Bu, çox əzizdir. Sənin Prezidentlə bütün görüşlərinin şəkilləridir. O şəkillər yəqin ki, sizdə var, amma bunlar bir albomdadır.
XANIŞ ŞAHIYEV: Mən söz üçün gəzən adam deyiləm. Mən zəhmət adamıyam, nəyinsə xatirinə, kimisə tərifləmərəm. Hər sözün düzü olmadan danışmağa dəyməz. Sənin bircə əmi sözün hər şeydir. Prezident adi bir çobana əmi deyir!
İLHAM ƏLİYEV: Prezident olsam da, olmasam da, mən həqiqəti deyirəm. Prezident bir vəzifədir, böyük məsuliyyətdir.
XANIŞ ŞAHIYEV: Əminin bir böyüklüyü də odur ki, mən heç vaxt heç kimdən təmənna etmirəm. Ali təhsili olan bir oğlum, üç-dörd nəvəm var. Amma heç kimə söz deməmişəm. Cənab Prezident, burada bir cöngəm var, onu Sizin ayağınız altında kəsərəm.
İLHAM ƏLİYEV: Sağ ol, biz gedək, sonra kəsərsən.
X X X
Prezident İlham Əliyev Xanış Şahıyevə televizor hədiyyə etdi, onun ulu öndər Heydər Əliyev ilə görüşləri zamanı çəkilmiş şəkillərdən ibarət fotoalbomu təqdim etdi.
Bölmənin digər xəbərləri
