UNİBANK YENİ LAYİHƏ HƏYATA KEÇİRİR
AZƏRTAC xəbər verir ki, Unibankın müştəriləri yeni “İnternet-Bank” xidməti sayəsində ölkə daxilində, eləcə də onun hüdudlarından kənarda pul vəsaitinin özünün bir hesabından digərinə, Unibankın, yaxud başqa bankın müştərisinin hesabına İnternet vasitəsilə köçürülməsi kimi bank əməliyyatları həyata keçirə biləcəklər. Bankdan AZƏRTAC-ın müxbirinə bildirmişlər ki, bu xidmət müştəriyə vəsaiti bir valyutadan digərinə çevirmək, hesablarda vəsaitin qalıqları və onların hərəkəti, Azərbaycan Milli Bankı valyutalarının məzənnələri və Unibankın dönərli valyutalarının kommersiya məzənnələri haqqında məlumat almaq imkanı verir. “İnternet-Bank” xidmətinə qoşulma pulsuzdur.
İndi bankın müştəriləri öz vəsaitlərini banka gəlmədən tez, etibarlı və təhlükəsiz idarə etmək üçün real imkan əldə etmişlər.
İnternet-bankinq Azərbaycanın maliyyə bazarı üçün yeni yüksək texnoloji vasitə olduğu üçün hətta ən təcrübəli istifadəçilərdə belə suallar yarana bilər. Müştərilərin bütün sorğularına operativ reaksiya vermək üçün Unibank “İnternet-Bank” sistemində xüsusi “Sual-Cavab” opsiyası hazırlamışdır.
Bu opsiya sayəsində istifadəçilər onları maraqlandıran bütün suallarla bağlı bankın mütəxəssisləri ilə məsləhətləşə bilərlər.
“İnternet-Bank” xidmətinin istifadəçisi olmaq üçün müştəri bankın Bakıdakı “Mərkəzi” (Rəşid Behbudov küçəsi, 57), yaxud 17 nömrəli (Rəşid Behbudov küçəsi, 65) filialına müraciət etməlidir. Gələcəkdə bank “İnternet-Bank” sisteminə qoşulmaq üçün bütün filiallarda müştərilərdən sifarişlər qəbul edəcəkdir.
