“UNİBANK”IN QİYMƏTLİ KAĞIZLARLA HƏYATA KEÇİRDİYİ ƏMƏLİYYATLARIN HƏCMİ 5 DƏFƏ ARTMIŞDIR
Bankdan AZƏRTAC-ın müxbirinə bildirmişlər ki, 2005-ci ilin yanvar-noyabr aylarında “UniBank” 78,5 milyard manatlıq broker əməliyyatları həyata keçirmişdir. Bu isə 2004-cü ilin müvafiq dövründəkindən 6 dəfə çoxdur.
Cari ilin 11 ayı ərzində aparılmış diler əməliyyatlarının ümumi həcmi ötən ilin müvafiq dövründəkinə nisbətən 5 dəfədən çox artaraq, 160,1 milyard manata çatmışdır.
“UniBank”ın idarə heyəti sədrinin müavini Samir Balayev demişdir: “Bu gün “UniBank” müxtəlif qiymətli kağızlarla, o cümlədən Dövlət qısamüddətli istiqrazları, Azərbaycan Milli Bankının notları, korporativ emitentlərin istiqrazları və səhmləri ilə əməliyyatların xidmət texnologiyasından istifadə edərək, yerli fond bazarında müştərilərin sərmayə fəallığına kömək edir.
“UniBank”ın diler və broker lisenziyası müştərilərə anderrayter və broker xidmətləri göstərməyə imkan verir.
Müştərilərin, o cümlədən rezident və qeyri-rezident, hüquqi və fiziki şəxslər olan müştərilərin sərmayə fəallığı artır. Dövlət qiymətli kağızlarından likvidliyin idarə olunmasının etibarlı və səmərəli aləti kimi istifadə edən “UniBank”ın özünün də fəallığı artmışdır”.
Bölmənin digər xəbərləri
