Universitetin şəhid məzunlarına həsr olunmuş anım tədbiri
Bakı, 1 noyabr, AZƏRTAC
Bakı Dövlət Universitetinin (BDU) “BDU könüllüləri” təşkilatının Tətbiqi riyaziyyat və kibernetika fakültəsi üzrə üzvlərinin təşəbbüsü ilə fakültənin şəhid məzunları Tural Eyyubov və Rabil İsmayılovun xatirəsinə həsr olunmuş anım tədbiri keçirilib.
Bu barədə AZƏRTAC-a BDU-dan məlumat verilib.
Əvvəlcə Azərbaycan Respublikasının Dövlət Himni səsləndirilib. Şəhidlərin əziz xatirəsi yad olunub.
Professor və müəllimlərin, tələbələrin, şəhidlərin ailə üzvlərinin və qazilərin iştirak etdikləri tədbirdə çıxış edən Tətbiqi riyaziyyat və kibernetika fakültəsinin dekanı Məhəmməd Mehdiyev Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi, şanlı Ordumuzun gücü ilə Vətən müharibəsi zamanı Zəfər qazandığımızı, torpaqlarımızın işğaldan azad olunduğunu vurğulayıb. O qeyd edib ki, biz Qələbəmizlə daim qürur duyuruq. Ölkəmizin ərazi bütövlüyü naminə canlarından keçən Vətən övladlarının əziz xatirəsi daim ürəklərdə yaşayacaq.
Fakültənin dekan müavini dosent Şamo Cəbrayılov və müəllimi Hacı Məsmalıyev çıxışlarında gəncləri vətənpərvərliyi və cəsarətləri ilə məktəb yaratmış şəhidlərimizin qəhrəmanlıq salnaməsini dərindən öyrənməyə çağırıblar.
Şəhid məzunların ailə üzvləri, tələbə yoldaşları çıxış edərək, onlarla bağlı xatirələrini bölüşüblər.
Şəhidlərə həsr edilmiş videoçarx nümayiş olunub.
Bölmənin digər xəbərləri
