ÜST: COVID-19-la mübarizədə bəşəriyyət yolun təxminən 60 faizini keçib
Bakı, 11 oktyabr, AZƏRTAC
Bəşəriyyət tezliklə COVID-19 ilə mübarizədə yolun 60 faizini keçəcək, amma qarşıda hələ də gözlənilməz maneələrlə qarşılaşa bilərik, ona görə də pandemiyanın bitəcəyi müddəti proqnozlaşdırmaq hələ tezdir. AZƏRTAC xəbər verir ki, bu barədə Ümumdünya Səhiyyə Təşkilatının (ÜST) baş elmi işçisi Sumya Svaminatan İsveçrənin “SonntagsBlick” qəzetinə verdiyi müsahibəsində bildirib.
"Pandemiyanı marafonla müqayisə etdikdə" bəşəriyyətin hazırda harada olduğu barədə suala cavab verərkən, o deyib: "Ümid edirəm ki, tezliklə marşrutun 60 faizini keçəcəyik. Lakin növbəti gözlənilməz maneəni aşmaq məcburiyyətində qalmağımız da istisna deyil. Tezliklə son xətti keçəcəyimizi söyləmək tez olardı, bu belə deyil. Qarşıda çox müəmmalı məsələlərlə üzləşə bilərik və onların arasında SARS-CoV-2 koronavirusunun yeni variantlarının gözlənilmədən peyda olunması da mümkündür”, - deyə bildirib.
Baş elmi işçi bununla əlaqədar olaraq dünyanın müxtəlif ölkələrində və bölgələrində əhalinin COVID-19 əleyhinə vaksinasiya ilə əhatə edilməsindəki əhəmiyyətli fərqə diqqət çəkib. Bəzi dövlətlərdə əhalinin 70-80 faizi peyvənd olunub, Afrikada isə vaksinasiya səviyyəsi 4 faizə də çatmır. "Bu vəziyyətlə nə qədər çox barışsaq, koronavirusun yeni variantlarının əmələ gəlməsi riski bir o qədər yüksək olacaq", - deyə o sözünü yekunlaşdırıb.
Bölmənin digər xəbərləri
