ÜST: Süni intellekt səhiyyə sahəsində yeni imkanlar açır, lakin səmərəli tənzimləmə tələb olunur
Bakı, 20 oktyabr, AZƏRTAC
Ümumdünya səhiyyə təşkilatı (ÜST) süni intellektdən (Sİ) istifadəni daha səmərəli tənzimləməyə çağırıb.
AZƏRTAC xəbər verir ki, təşkilatın son dərc edilmiş təlimatında təhlükəsiz süni intellekt sistemlərinin yaradılması və müsbət vasitə kimi onların istifadə edilməsi barədə dialoqun inkişaf etdirilməsinin vacibliyi vurğulanır.
Tibbi biliklərin artan əlçatanlığını və analitik metodlarda irəliləyişi nəzərə alaraq, ÜST ekspertləri süni intellektin səhiyyə sahəsində nəticələrinin yaxşılaşdırılması üçün potensial imkanlarını dərk edirlər. Bu, xüsusilə, klinik sınaqlar və tibbi diaqnostikaya aiddir.
Lakin sağlamlıq haqqında məlumatların istifadə edilməsində süni intellekt sistemləri potensial olaraq şəxsi məxfi məlumata çıxış əldə edə bilərlər, məxfiliyin qorunması üçün də etibarlı hüquqi-normativ bazanın yaradılması tələb olunur.
“Süni intellekt səhiyyə sahəsində böyük perspektivlər açır, lakin, həmçinin qeyri-etik məlumat toplanması, kibertəhlükəsizlik təhdidləri, eləcə də qərəzlik və ya dezinformasiya da daxil olmaqla, ciddi problemlərə bağlıdır”, - deyə ÜST rəhbəri Tedros Adhanom Qebreyesus bildirib.
Süni intellekt texnologiyalarının səhiyyə sahəsində sürətli inkişafının məsuliyyətli şəkildə idarə olunmasının zəruriliyi kontekstində ÜST şəffaflığın, sənədləşmənin və məlumatların yoxlanmasının vacibliyini vurğulayır.
“Bu yeni təlimat istər xərçəngin müalicəsində və ya vərəmin aşkar olunmasında riskləri minimallaşdıraraq, ölkələrə süni intellekti səmərəli tənzimləməyə və onun potensialından istifadə etməyə köməklik edəcək”, - deyə Qebreyesus qeyd edib.
ÜST qeyd edir ki, süni intellekt sistemləri mürəkkəbdir və yalnız bazasında yarandıqları koddan deyil, həm də öyrəndikləri məlumatlardan asılıdır. Daha səmərəli tənzimləmə xurafat və ayrı-seçkilik probleminin öhdəsindən gəlməyə kömək edəcək.
Süni intellektdən istifadə edərkən cinsi, irqi və etnik mənsubiyyət kimi kateqoriyalar üzrə seqreqasiya olunmuş məlumatlar əsasında qaydalar tətbiq edilməlidir.
Bölmənin digər xəbərləri
