“Üzeyir Hacıbəyli müasirlərin düşüncəsində” kitabının təqdimatı keçirilib
Bakı, 27 sentyabr, AZƏRTAC
Dahi sənətkarımız Üzeyir Hacıbəylinin irsi daim tədqiqatçıların diqqət mərkəzindədir. Ölməz sənətkarın anadan olmasının 140 illik yubileyində bu tədqiqat işlərinə daha yeniləri əlavə olundu. XVII Üzeyir Hacıbəyli Beynəlxalq Musiqi Festivalı çərçivəsində keçirilən tədbirlərdə Üzeyir bəyə həsr olunan bir neçə yeni musiqi əsərləri və tədqiqat işləri təqdim edildi. Bu mənada Azərbaycan Bəstəkarlar İttifaqında Üzeyir bəyə həsr olunan yeni və maraqlı bir kitabın təqdimatı keçirildi. Bu, sənətşünaslıq üzrə fəlsəfə doktoru, Əməkdar mədəniyyət işçisi Səadət Təhmirazqızının tərtibçi-müəllif olduğu “Üzeyir Hacıbəyli müasirlərin düşüncəsində” kitabıdır.
Bu barədə AZƏRTAC-a Azərbaycan Bəstəkarlar İttifaqından məlumat verilib.
Qeyd edək ki, bu kitabın I cildi 2016-cı ildə Mədəniyyət Nazirliyinin Mədəniyyət üzrə Elmi Metodiki və İxtisasartırma Mərkəzi tərəfindən nəşr edilib. Kitabda müxtəlif elm və incəsənət xadimlərinin Üzeyir bəy haqqında düşüncələri öz əksini tapıb. Təqdim olunan II cild də eyni qəbildəndir. Təbii ki, burada I cilddən fərqli başqa müəlliflərin məqalələri yer alıb.
Azərbaycan Bəstəkarlar İttifaqında keçirilən təqdimat mərasimi dahi Üzeyir Hacıbəylinin yadigar videoyazısı və Ulu Öndər Heydər Əliyevin Üzeyir Hacıbəyli haqqında fikirlərini əks etdirən videoçarxla başlayıb.
Təqdimatı giriş sözü ilə açan Azərbaycan Bəstəkarlar İttifaqının sədri, Xalq artisti, AMEA-nın müxbir üzvü, professor Firəngiz Əlizadə Üzeyir Hacıbəyli Beynəlxalq Musiqi Festivalının dahi sənətkarın irsinin təbliğində mühüm əhəmiyyət kəsb etdiyini xüsusi vurğulayıb. Firəngiz Əlizadə festival çərçivəsində Bəstəkarlar İttifaqının keçirdiyi tədbirlər haqqında danışaraq hər il bəstəkar və musiqişünasların Üzeyir bəy irsinə dair yeni əsərlər, kitablar qələmə aldığını diqqətə çatdırıb. Həmçinin Firəngiz Əlizadə belə nəfis şəkildə nəşr olunmuş kitabların Azərbaycan musiqi mədəniyyəti üçün mühüm əhəmiyyətini qeyd edib.
Tədbirdə Əməkdar incəsənət xadimləri, professorlar Gülnaz Abdullazadə, Həcər Babayeva, Faiq Nağıyev və Elnarə Dadaşova kitab haqqında fikirlərini bölüşərək Səadət Təhmirazqızının bir musiqişünas olaraq geniş fəaliyyətindən söhbət açıblar.
Tədbirin bədii hissəsində Ü.Hacıbəylinin “Şəfqət bacısı” (söz: Səməd Vurğun, Oxuyur: Əməkdar artist Gülüstan Əliyeva, müşayiət edir: Beynəlxalq müsabiqələr laureatı Lalə Xəlilli), “Arşın mal alan” operettası əsasında bəstəkar, sənətşünaslıq üzrə fəlsəfə doktoru Sevda Məmmədlinin fortepiano üçün işləmələri (İfa edir: müəllif), “Arşın mal alan” operettasından Əsgərin ariyası (İfa edir: AMK-nın I kurs tələbəsi Mikayıl Nəsirov, Konsertmeyster: Rəhimə Qurbanova), “Koroğlu” operasından Xanəndə qızın mahnısı (İfa edir: AMK-nın IV kurs tələbəsi Günel Əsədova, Konsertmeyster: Vəfa Əzizova), “Çağırış” (İfa edir: Q.Qarayev adına Mərkəzi İncəsənət məktəbinin IV sinif şagirdi Əli Nurullayev, müşayiət edir: Mətanət Nurullayeva) əsərləri səslənib.
Təqdimatın aparıcısı müəllif, sənətşünaslıq üzrə fəlsəfə doktoru, Əməkdar mədəniyyət işçisi Səadət Təhmirazqızı olub.
Bölmənin digər xəbərləri
