Vətən müharibəsi iştirakçısı: Şuşa öz gözəlliyi ilə məni valeh etdi
Bakı, 27 aprel, AZƏRTAC
Məni ən çox təəssüfləndirən odur ki, noyabrın 6-da Şuşanın Daşaltı kəndini erməni quldur birləşmələrindən azad edərkən çoxsaylı qəlpə yarası aldım. Məni ön xətdən çıxarsalar da, yaralı halda Daşaltıda qaldım. Ağır döyüş getdiyindən yaralıları döyüş meydanından çıxarmaq çətin idi. Səhəri günü məni Hadrutdakı səyyar hospitala apararaq ilkin tibbi yardım göstərildi, sonra müalicəmi Füzulidəki hospitalda davam etdirdim. Döyüşçü kimi Şuşaya daxil olmaq qismətimdə olmasa da, Qələbədən sonra ilk dəfə şəhərə daxil olaraq çox böyük sevinc hissi və məğrurluqla onun küçələrinə ayaq basdım...
Hazırda Şağan Reabilitasiya Pansionatında müalicə alan Vətən müharibəsinin ikinci qrup əlili Baxış Baxışov bu barədə AZƏRTAC-ın müxbiri ilə söhbətində deyib.
O, 2020-ci ilin aprelində hərbi xidmətə çağırılıb. Kəşfiyyat bölüyündə xidmət edən Baxış sentyabrın 27-də haqq savaşına qoşulanlardan olub. Füzuli, Xocavənd, Qubadlı və Şuşa rayonlarının kəndləri uğrunda döyüş əməliyyatlarında iştirak edib. “Cəsur döyüşçü”, “Vətən müharibəsi iştirakçısı”, “Füzulinin azad olunmasına görə”, “Xocavəndin azad olunmasına görə”, “Qubadlının azad olunmasına görə” və “Şuşanın azad olunmasına görə” medalları ilə təltif olunub.
Bir həftədir ki, Şağan Reabilitasiya Pansionatında müalicə alan Vətən müharibəsi döyüşçüsü deyib: “Sağ qolumda hərəkət məhdudiyyəti olduğuna görə hər gün masaj, fizioterapiya, yod vannası, müalicəvi bədən tərbiyəsi və digər prosedurlar qəbul edirəm. Burada aparılan müalicə kursundan çox razıyam. Əvvəla, həkim və tibb işçiləri xəstələri çox böyük qayğı ilə əhatə edirlər. İkincisi, müalicələrin müsbət təsirini ilk günlərdən hiss etməyə başlamışam. Ümid edirəm ki, müalicə kursunun sonunadək daha uğurlu nəticələr əldə etmək mümkün olacaq”.
B.Baxışov iki dəfə Şuşanı ziyarət etsə də, yenə də bu gözəl şəhərə getmək arzusundadır: “Dağlar qoynunda qərar tutan bu gözəl şəhərdə duyğularım vəcdə gəldi. Şuşa qeyri-adi gözəlliyi ilə məni valeh etdi. Onu ilk dəfə görəndə də özümü çox xoşbəxt hiss elədim. Doğrudan da, bu şəhər uğrunda qan tökməyə dəyərmiş. Bu yolda sağlamlığımı itirsəm də, onun düşməndən azad olunmasında əməyim olduğuna görə çox məmnunam. Növbəti imkan olan kimi yenə də uğrunda qan tökdüyüm bu şəhərin ziyarətinə gedəcəyəm”.
Bölmənin digər xəbərləri
