Bakı, 6 noyabr, AZƏRTAC

İkinci dəfə öz müstəqilliyini bərpa edən Azərbaycan tarixi sınaqlarla üzləşdi. 1990-cı illərin əvvəllərində hakimiyyətə gələn qüvvələr xalqın milli birliyinə nail olmaq əvəzinə ölkədə xaosa, anarxiyaya yol açan siyasət yürütməyə başladı. Nəticədə Azərbaycan yox olmaq, parçalanmaq təhlükəsi ilə üzləşmişdi. Bir tərəfdən də Ermənistanın işğalçı siyasəti nəticəsində torpaqlarımız bir-birinin ardınca işğal edilir, xalqımıza qarşı erməni cəlladları tərəfindən soyqırımı, etnik təmizləmə cinayətləri həyata keçirildi. Belə bir şəraitdə ölkəni ağır durumdan xilas edən tarixi şəxsiyyət məhz Ulu Öndər Heydər Əliyev idi. Xalqının, dövlətinin ağır durumunda hakimiyyətə gələn Ümummilli Lider Heydər Əliyev Azərbaycanı ağır durumdan xilas etdi. Ölkəmiz məhz Dahi Liderin uzaqgörənliyi sayəsində normal inkişaf müstəvisinə qədəm qoydu. Milli birlik, təmin edildi. Xalqın özünə inamı qayıtdı. Dövlət-xalq birliyi nəticəsində Azərbaycan bu ağır sınaqdan qurtulmuş oldu.

Bu sözləri AZƏRTAC-a açıqlamasında Yeni Azərbaycan Partiyasının Təftiş Komissiyasının sədri, Milli Məclisin deputatı Sevinc Hüseynova deyib.

O bildirib ki, Ümummilli Lider Heydər Əliyevin dərin zəkası, uzaqgörənliyi, xalqına, dövlətinə olan sonsuz sevgisi sayəsində Azərbaycan öz tarixinin yeni bir mərhələsinə qədəm qoydu. Bu mərhələ dahi liderin strategiyasına uyğun inkişafı, tərəqqini özündə ehtiva edirdi. Ümummilli Liderin qətiyyəti sayəsində ölkəmizdə ictimai-siyasi sabitlik bərqərar edildi. Ermənistanın işğal siyasətinin qarşısını almaq, ordu quruculuğuna nail olmaq üçün atəşkəs əldə edildi. Qısa zamanda ölkədə bütün sahələri əhatə edən islahatlara başlanıldı. İlk növbədə, ölkənin iqtisadi əsasları formalaşdırıldı. Ordu quruculuğu sahəsində vacib addımlar atıldı. Əsrin müqaviləsinin imzalanması ilə Azərbaycanın müstəqil daxili-xarici siyasət kursunun nəticəsi olaraq mövqeləri beynəlxalq arenada möhkəmlənməyə başladı. Ermənistanın işğal siyasətinin beynəlxalq birlik tərəfindən pislənilməsi, Azərbaycanın ərazi bütövlüyünün, suverenliyinin bərpası ilə bağlı hüquqi, fundamental əsaslar yaradıldı. Azərbaycanı yox olmaqdan, parçalanmaqdan xilas edən Ulu Öndər ölkəmizin gələcəyi, inkişafı, ərazi bütövlüyünün təminatı üçün uğurlu strategiya müəyyənləşdirdi. Prezident İlham Əliyev tərəfindən böyük əzm və uğurla davam etdirilən bu strategiya Azərbaycanın regional və qlobal miqyasda güclü, qalib, inkişaf edən, dünyada söz sahibi ölkəyə çevrilməsini təmin etdi. Sözsüz ki, Prezident İlham Əliyevin dövlət siyasətinin mütləq prioriteti işğal altında olan torpaqlarımızın düşməndən azad edilməsi və Azərbaycanın bütün sərhədləri boyunca bayrağımızın dalğalanması olub. Uzun illər ərzində danışıqlar masasında prinsipiallıq göstərən Azərbaycan, eyni zamanda, güclü ordu yaradırdı. Ordu quruculuğu hər zaman Prezident İlham Əliyevin dövlət siyasətinin prioritet istiqamətini təşkil edib. Məhz bu məqsədə xidmət edən Azərbaycanda hərbi sənaye kompleksinin yaradılması da ölkəmizin hərbi qüdrətini artırmış oldu. Eyni zamanda, Azərbaycan özünün hədəflərinə nail olmaq üçün iqtisadiyyatını gücləndirirdi. Bütün regional layihələrdən təcrid olunmuş Ermənistandan fərqli olaraq Azərbaycan transmilli layihələrlə regionda yeni mənzərə yaradıb. Ölkəmiz bölgənin enerji, nəqliyyat xəritəsini yenidən tərtib etdi. Azərbaycanın təşəbbüsləri təkcə xalqımızın deyil, bir çox ölkələrin, o cümlədən region dövlətlərinin maraqlarını təmin edib. Sözsüz ki, bu amillər Azərbaycanın beynəlxalq nüfuzunu daha da gücləndirdi. Ölkəmizlə tərəfdaşlıq edən dövlətlərin sayının artması beynəlxalq münasibətlər sistemində daha səmərəli əməkdaşlığı təşviq edib. Bu bir reallıqdır ki, Azərbaycan münaqişə boyunca bütün aparıcı beynəlxalq təşkilatlarla əməkdaşlıq edib və münaqişənin həlli üçün hüquqi baza formalaşdırıb. Bu baxımdan BMT Baş Assambleyası, Qoşulmama Hərəkatı, Avropa Şurası, Avropa Parlamenti, İslam Əməkdaşlıq Təşkilatı və digər qurumlar ölkəmizin ərazi bütövlüyünün təmin edilməsi ilə bağlı vacib qətnamələr qəbul edib. Amma bütün bunlara baxmayaraq, Azərbaycanın haqlı mövqeyinə hər zamankı kimi riyakar yanaşanlar da olub. Məhz keçmiş Qarabağ münaqişəsinin nizamlanması üçün təsis olunmuş ATƏM-in (sonradan ATƏT) Minsk qrupu fəaliyyətinin 29 ili ərzində məsələnin həllinə yox, dondurulmasına çalışıb. Bütün bunlar isə ikili standartlar siyasətinin nəticəsi olaraq ortaya çıxıb. İşğalçıya, işğala məruz qalmış tərəfə eyni münasibət bəslənilib. Nəticədə beynəlxalq qətnamələr 30 il kağız üzərində qalıb. Hər zaman məsuliyyətli ölkə olaraq Azərbaycan daim beynəlxalq hüquqa sadiqliyini nümayiş etdirərək münaqişənin danışıqlar vasitəsilə həllinə çalışıb. Həmçinin BMT Təhlükəsizlik Şurasının Ermənistan silahlı qüvvələrinin işğal olunmuş Azərbaycan ərazilərindən dərhal çıxarılmasını tələb edən 4 qətnaməsi kağız üzərində qalmışdı. Bunun fonunda aramsız olaraq davam edən Ermənistanın təxribatçı addımları, bəyanatları, hərəkətləri müharibəni qaçılmaz edirdi. Vətən müharibəsi nəticəsində Azərbaycan xalqı tarixi ədaləti və beynəlxalq qanunları özü bərpa etdi.

Milli Məclisin deputatı qeyd edib ki, Azərbaycana qarşı 200 ildən çox davam edən düşmənçilik siyasəti ermənilərin məhz çar Rusiyası zamanı əzəli torpaqlarımıza Qarabağa köçürüldükləri vaxtdan başlayıb. Azərbaycanlılara qarşı etnik dözümsüzlük çar Rusiyasından sonrakı illərdə də davam edib. Erməni daşnakları və cəlladları tərəfindən 1905-1907-ci və 1918-ci illərdə yüz minlərlə soydaşımız vəhşicəsinə qətlə yetirilib. 1918-1920-ci illər isə xalqımızın yaddaşında erməni silahlı quldur dəstələrinin xüsusi qəddarlığı ilə qalıb. Ermənistan silahlı qüvvələrinin Azərbaycan torpaqlarını işğal etməsi azərbaycanlıları doğma yurd-yuvalarından didərgin salmaqla yanaşı, ölkəmizin iqtisadiyyatına və mədəni irsinə də ağır zərbə vurub. Nəticədə bir milyondan çox azərbaycanlı 30 il ərzində qaçqın və məcburi köçkün həyatı sürməyə məcbur olub. Bu illər ərzində isə Ermənistan işğal altında saxladığı Azərbaycan ərazilərini acınacaqlı vəziyyətə salıb, şəhər və kəndlərdə infrastrukturu tamamilə məhv edib, ölkəmizə milyardlarla dollar həcmində maddi ziyan vurub. Buna baxmayaraq, işğal siyasətini davam etdirən Ermənistan təxribatlardan da əl çəkmir, davamlı olaraq yaşayış məntəqələrini, Ordumuzun bölmələrini hədəfə alırdı.

“Növbəti erməni təxribatı 2020-ci il sentyabrın 27-də baş verdi. Məhz Ermənistan silahlı qüvvələrinin təxribatlarının qarşısını almaq, mülki əhalinin təhlükəsizliyini təmin etmək məqsədilə Azərbaycan Ordusunun komandanlığı tərəfindən qoşunlarımızın bütün cəbhəboyu əks-hücum əməliyyatı başlaması barədə qərar verildi. Azərbaycan xalqı 30 ilə yaxın müddət ərzində bu əmri gözləyirdi. Beləliklə 44 gün davam edən “Dəmir yumruq” əməliyyatı xalq-ordu birliyinin təcəssümü oldu. Müharibə dövründə xalq öz dəmir yumruğunu, birliyini və gücünü nümayiş etdirə bildi. On minlərlə insanın orduya könüllü yazılması, eləcə də təxribatlar zamanı öz evlərini tərk etməməsi faktı Azərbaycanda xalq-ordu birliyi və orduya, qələbəyə inamın göstəricisi idi. Bununla da Azərbaycan tarixinə Zəfər salnaməsi kimi daxil olan “Dəmir yumruq” əməliyyatının ilk saatlarında cəbhə xəttindən sevindirici xəbərlər gəlməyə başladı. Qırx dörd gün ərzində hər gün Azərbaycan Ordusu irəli getdi, hər gün yeni şəhərlər, kəndlər, qəsəbələr, yüksəkliklər azad edildi. Azərbaycan əsgəri, zabiti bir amalla vuruşurdu ki, işğala son qoyulsun və tarixi ədalət zəfər çalsın. Azərbaycan Silahlı Qüvvələri 44 gün ərzində düşmən ordusunu məhv edərək öz ərazi bütövlüyünü bərpa etdi. Azərbaycan Ordusunun sentyabrın 27-də Qarabağda başladığı uğurlu əks-hücum əməliyyatı nəticəsində noyabrın 9-dək 5 şəhər, 4 qəsəbə və 286 kənd işğaldan azad edildi. Şuşanın işğaldan azad olunması isə olduqca strateji əhəmiyyət kəsb edirdi. Tarixi Şuşanın strateji yerləşməsi faktiki olaraq onun azad olunmasından sonra müharibənin taleyini həll etdi. Beləliklə, işğalçı döyüş meydanında məğlub edildi. Rəsmi İrəvanın kapitulyasiyasının təcəssümü olan üçtərəfli Bəyanat imzalandı. Noyabrın 9-dan 10-na keçən gecə Prezident İlham Əliyev, Rusiya Prezidenti Vladimir Putin və Ermənistanın baş naziri Nikol Paşinyan tərəfindən üçtərəfli Bəyanatın imzalanması ilə hərbi əməliyyatlar dayandırıldı. Həmin Bəyanata uyğun olaraq, Ermənistan noyabrın 20-də Ağdam, 25-də Kəlbəcər, dekabrın 1-də isə Laçın rayonlarını Azərbaycan Silahlı Qüvvələrinə təhvil verdi. 2022-ci ilin avqustun 26-da isə Laçın şəhəri, Zabux və Sus kəndləri nəzarətə götürüldü. Qəhrəman hərbçilərimizin şücaəti, rəşadəti hesabına, şəhidlərimizin qanı-canı bahasına bütün dünya Azərbaycanın şanlı Qələbəsinin şahidi oldu” , - deyə deputat qeyd edib.

O deyib ki, Azərbaycan Ordusu öz qəhrəmanlığı və peşəkarlığı ilə Ermənistanın silahlı qüvvələrini məhv etməklə yanaşı, erməni mifini də darmadağın etdi. Təcavüzkar erməni əsgəri haqq uğrunda savaşan Azərbaycan əsgəri qarşısında dura bilmədi. Bu gün məhz Bakıdakı Hərbi Qənimətlər Parkına gələn hər bir insan Azərbaycan Silahlı Qüvvələrinin gücünü və iradəsini görür. Eyni zamanda, Azərbaycanın Vətən müharibəsində Qələbəsinin şərəfinə 2020-ci il dekabrın 10-da Bakının Azadlıq Meydanında keçirilmiş Zəfər paradında 3000 Azərbaycan əsgəri və zabiti ilə yanaşı, Türkiyə əsgər və zabitləri iştirak ediblər. Paradı Azərbaycan Respublikasının Prezidenti, Müzəffər Ali Baş Komandanı İlham Əliyev və fəxri qonaq qismində dəvət olunmuş Türkiyə Prezidenti Rəcəb Tayyib Ərdoğan qəbul edib. Bu gün də Azərbaycan Ordusunun apardığı döyüş əməliyyatları ayrı-ayrı mərkəzlər tərəfindən öyrənilməkdədir. XXI əsrin müharibəsini aparan Azərbaycan Silahlı Qüvvələrinin döyüş təcrübəsi və taktikası bu gün dünyanın inkişaf etmiş ölkələrinin hərbi məktəblərində tədris edilir. Bununla yanaşı, 44 günlük Vətən müharibəsində Prezident İlham Əliyev tərəfindən verilmiş müsahibənin hər biri Azərbaycanın diplomatik uğuru idi. Beynəlxalq təşkilatlar vasitəsilə ölkəmizə təzyiqlər cəhdinin qarşısı müvəffəqiyyətlə alındı. Prezident İlham Əliyev müharibə dövründə dünyanın ən böyük media qurumlarına 30-dan çox müsahibə verdi, münaqişə ilə bağlı əsl həqiqətləri beynəlxalq ictimaiyyətə çatdırdı. İnformasiya savaşının əsas konturlarını təşkil edən bu müsahibələr mediamızın fəaliyyətinə istiqamət verdi. Müzəffər Ali Baş Komandanın müharibə ilə bağlı müsahibələri XXI əsr üçün yeni üslub, yeni model nitq strategiyası hesab edilir. Sözsüz ki, İkinci Qarabağ müharibəsi zamanı Türkiyə Prezident Rəcəb Tayyib Ərdoğanın müharibənin ilk saatlarında “Azərbaycan tək deyil, Türkiyə onun yanındadır” deməsi Azərbaycana əlavə güc verdi. Tarixi Şuşa Bəyannaməsini imzalayaraq Türkiyə və Azərbaycan rəsmən müttəfiqlik zirvəsinə ucaldı. Bu müttəfiqlik özünü hər yerdə göstərir. Bununla yanaşı, iki qardaş ölkə rəhbərinin Qələbə paradını birgə qəbul etməsi beynəlxalq ictimaiyyətə verilmiş mesaj idi. Onun sözlərinə görə, Vətən müharibəsi, həmçinin milli birliyin açıq təzahürü kimi yadda qaldı. “Dəmir yumruq” milli birliyin və gücün rəmzi kimi dünyanın müxtəlif ölkələrində yaşayan azərbaycanlılar, habelə Azərbaycanın haqq işinə dəstək verən digər xalqların nümayəndələri üçün simvola çevrildi.

Artıq azad edilmiş ərazilərə soydaşlarımızın geri dönüşü ilə bağlı zəruri işlərin görüldüyünü söyləyən S.Hüseynova bildirib ki, Böyük Qayıdış strategiyası yeni infrastrukturun yaradılması ilə yanaşı, işğaldan azad olunmuş ərazilərin ümumən regionun yeni inkişaf modelinə çevirməkdən ibarətdir. Müzəffər Ali Baş Komandan İlham Əliyevin indi böyük dövlət xadimi və Azərbaycan xalqının Lideri kimi əsas missiyası dövlətin və xalqın gücü ilə düşmənin viran qoyduğu işğaldan azad edilən şəhər və kəndlərimizin yenidən qurulması, öz yurd-yuvalarından didərgin düşən soydaşlarımızın evlərinə qaytarılmasıdır.

“Qarabağ və Şərqi Zəngəzurun artıq mənzərəsi dəyişir. Bu ərazilərin əsl sahibləri öz doğma yurdlarına qayıdır. Xankəndidə Qarabağ Universitetinin qısa zamanda fəaliyyətə başlaması və ilk tələbələrini qəbul etməsi tarixi hadisə idi. Artıq mindən çox tələbə Qarabağ Universitetində təhsil almağa başlayıb. Eyni zamanda, bu gün Qarabağ və Şərqi Zəngəzurda məskunlaşma Böyük Qayıdış konsepsiyasına uyğun olaraq davam edir. Artıq azad olunmuş ərazilərdə 30 minə yaxın şəxs yaşayır və bu ərazilərin yenidən qurulmasında iştirak edirlər. Bunlar dövlət qulluqçuları, müəllimlər və geniş quruculuq-tikinti işlərinə cəlb edilən işçilərdir. Eyni zamanda, Şuşa, Laçın, Zəngilan rayonunun Ağalı kəndi, Talış kəndi, Zabux və Sus kəndlərinin sakinləri, Füzuli rayonunun keçmiş məcburi köçkünlərin bir qismi, ümumilikdə isə rəsmən 8700-dən çox keçmiş məcburi köçkünün öz ata-baba yurduna geri qayıdışı təmin edilib. Müzəffər Ali Baş Komandan tərəfindən tarixi Qələbənin əbədiləşdirilməsi və müharibə iştirakçılarına aid xüsusi orden və medallar təsis edilib ki, bu da ali diqqətin göstəricisi hesab olunur. Vətən müharibəsində Qələbə münasibətilə “Zəfər” və “Qarabağ” ordenləri, həmçinin 15 yeni medal təsis edilib. Həmçinin tarixi Zəfərin təbliği, şəhidlərimizin əziz xatirəsinin əbədiləşdirilməsi məqsədilə Bakıda Vətən müharibəsi memorial kompleksi və Zəfər muzeyi inşa olunur. Bütün bunlarla yanaşı, şəhidlərimizin əziz xatirəsi əbədiləşdirilir, onların ailələrinə ölkəmizdə xüsusi diqqət göstərilir, dövlət tərəfindən bütün lazımi işlər görülür. Azərbaycan şəhid ailələrinə göstərilən diqqətə görə dünya miqyasında nümunə sayıla bilər. Qarabağ müharibəsində həlak olmuş qəhrəman övladlarımızın ailələri tam miqyasda evlərlə, mənzillərlə təmin olunurlar. Dövlət öz əsgərinin yanındadır. Qarabağ qazilərinə dövlət tərəfindən lazımi dəstək göstərilir, onların məişət problemləri həll olunur”, - deyə S.Hüseynova əlavə edib.