Aprel hadisələri, Günnüt və Tovuz əməliyyatları Azərbaycan Ordusunun nəyə qadir olduğunun göstəricisi idi

Bakı, 22 may, AZƏRTAC

Azərbaycan Silahlı Qüvvələri Ulu Öndərin hakimiyyətə yenidən qayıtmasından sonra qısa zamanda torpaqlarımızın işğalının qarşısını aldı və Horadiz əməliyyatı adlanan əks-hücum əməliyyatı keçirərək 22 yaşayış məntəqəsi və 30 kilometrlik ərazinin Beyləqan, Cəbrayıl istiqamətində azad etdi. Bundan sonra düşmən Bişkek protokolunu imzalamağa məcbur oldu. Ondan sonra Ulu Öndərin rəhbərliyi ilə ordu quruculuğu sahəsində aparılan işlər nəticəsində Azərbaycan Silahlı Qüvvələri ən qısa zamanda bölgədə ən güclü ordu kimi formalaşdı. Bu sahədə islahatları davam etdirən Prezident, Ali Baş Komandan İlham Əliyev Azərbaycan Ordusunun ən müasir silahlarla təchiz edilməsinə və 50 ən güclülər arasında yer almasına nail oldu.

Bunu AZƏRTAC-a açıqlamasında ehtiyatda olan polkovnik, hərbi ekspert Şair Ramaldanov deyib.

Hərbi ekspert qeyd edib ki, indiyədək Azərbaycan Silahlı Qüvvələri çoxsaylı irimiqyaslı təlimlər keçirib. Hətta 25 min nəfərlik şəxsi heyətin iştiraki ilə təşkil edilən irimiqyaslı hərbi təlimlər Azərbaycan Ordusunun peşəkarlığının artırılmasına imkan yaratdı. Bütün bunlar Azərbaycana qarşı təxribatların qarşısının alınması və düşmənə adekvat cavab verilməsi ilə nəticələndi. Aprel döyüşləri zamanı Azərbaycan Ordusu gücünü göstərdi, Talış və Lələtəpə istiqamətlərində strateji mövqeləri və yüksəklikləri ələ keçirərək ermənilər tərəfindən yaradılmış Ohanyan keçilməz müdafiə xətti mifini darmadağın etdi. Ordumuzun bölmələri müdafiə xəttini yararaq düşməni strateji yüksəkliklərdən qovmağa nail oldu. Aprel döyüşlərindən sonra Ali Baş Komandan İlham Əliyev demişdi ki, Azərbaycan Ordusu işğalçı qüvvələri qısa zamanda darmadağın edərək öz ərazi bütövlüyünü bərpa etməyə qadirdir. Bu ordumuzun yeni uğurlara, qələbələr qazanmasına imkan yaratdı. Günnüt əməliyyatı zamanı mühəndis və kəşfiyyat işlərinin görülərək böyük ərazinin düşməndən azad edilməsi, strateji yüksəkliklərin ələ keçirilməsi həmin döyüşün Azərbaycan tarixində Naxçıvan Muxtar Respublikasında Əlahiddə Ümumqoşun Ordu tərəfindən aparılan ən uğurlu əməliyyat kimi tarixə düşdü. Naxçıvanda Günnüt əməliyyatının nəticəsi olaraq 11 min hektardan çox ərazi nəzarət altına götürüldü.

Onun sözlərinə görə, hərbi cəhətdən strateji yüksəkliklərin ələ keçirilməsi Gorus-Laçın-Xankəndi yoluna nəzarət etməyə imkan verdi. Hətta Günnüt əməliyyatından sonra sərhədin digər tərəfində Ermənistanla sərhədə yaxın yaşayış məntəqələrində ermənilər öz ordusuna güvənməyərək yaşayış məntəqələrini tərk etməyə başladı. Prezident İlham Əliyevin rəhbərliyi ilə o vaxtlar Azərbaycan Silahlı Qüvvələrində aparılan islahatların nəticəsində Naxçıvanda Ümumqoşun Əlahiddə Ordu yaradıldı. Bu da blokadada olan Naxçıvanın müdafiəsini müstəqil şəkildə qurmağa və onu müdafiə etməyə şərait yaratdı.

Hərbi ekspert xatırladıb ki, Ümummilli Lider Heydər Əliyevin Naxçıvana rəhbərliyi dövründə onun işğalına imkan verilmədi. Hələ o vaxtlar məhz Ulu Öndərin Naxçıvana gəlişindən sonra erməni silahlılarının onu işğal etməsinin qarşısı alındı və müdafiəsi təşkil edildi. Bu nailiyyətlər Azərbaycan Ordusunun erməni işğalçı qüvvələrini darmadağın edərək onun ərazi bütövlüyünü bərpa etmək imkanlarının göstəricisi idi. Sonralar 2020-ci ilin iyulunda Tovuzda hadisələri baş verdi, Goranboy istiqamətində təxribatın qarşısı alındı. Məqam yetişdiyi zaman Müzəffər Ali Baş Komandan İlham Əliyev əks-hücum əmri verdi və Azərbaycan Ordusu işğalçı qüvvələri qısa zamanda darmadağın edərək öz ərazi bütövlüyünü bərpa etdi. Ümumiyyətlə Vətən müharibəsində böyük Zəfərə gedən yollar kiçik qələbələrdən keçirdi. Müzəffər Ali Baş Komandan İlham Əliyev Azərbaycan xalqını ən böyük arzusuna - tarixi Zəfərə bu taleyüklü mərhələlərdən uğurla keçərək çatdırdı.

Şair Ramaldanov qeyd edib ki, Ulu Öndərin rəhbərliyi ilə həyata keçirilən Horadiz əməliyyatı, Aprel hadisələri, Günnüt, Tovuz əməliyyatları zamanı təxribatların qarşısının alınması Azərbaycan Ordusunun nəyə qadir olduğunun göstəricisi idi. Müasir silahlarla silahlanmış Azərbaycan Ordusunun hərb elmində müasir yanaşmaları nəticəsində öz döyüş taktikasını təlimlərdə tətbiq etdi. Ordumuz 44 günlük Vətən müharibəsi zamanı 30 illik müdafiə xəttini yardı, işğalçıları məhv etdi, öz ərazilərini düşmən tapdağından azad etdi. Sonralar da Azərbaycan Silahlı Qüvvələrində Türkiyə modelini tətbiq etmək istiqamətində aparılan işlər hazırda onu daha güclü edib. Azərbaycan Ordusu artıq istər Rusiyanın sülhməramlı qüvvələrinin müvəqqəti yerləşdiyi ərazilərdə, istər Qarabağ iqtisadi zonasında, istərsə də sərhəddə düşmənin bütün təxribatlarının qarşısını uğurla aldı. Beləliklə, Azərbaycan-Ermənistan sərhədində Laçın istiqamətində sərhəd-nəzarət mexanizmi yaradılmağa nail olundu.

“Hazırda dövlətimiz işğaldan azad olunmuş ərazilərdə bərpa-quruculuq və mina sahələrinin təmizlənməsi işlərini aparır. Həmin ərazilərdə infrastruktur yenidən bərpa olunur. Bütün bunlar - Azərbaycan Ordusunun gündən-günə güclənməsi, ölkəmizin beynəlxalq geosiyasi arenada artan nüfuzu onun üç il bundan əvvəl imzalanmış üçtərəfli Bəyannamədə nəzərdə tutulmuş bütün bəndlərin yerinə yetirilməsinə zəmanət yaradır”, - deyə ehtiyatda olan polkovnik vurğulayıb.