MƏDƏNİYYƏT
Vüqar İsayev: Aprel döyüşləri Azərbaycanı tarixi Zəfərə aparan yol idi
Bakı, 3 aprel, AZƏRTAC
Bu gün Azərbaycan Ordusunun parlaq tarixi qələbələrindən olan şanlı Aprel döyüşlərindən yeddi il ötür. 2016-cı ilin aprelində Ermənistan ordusunun təmas xəttində ardıcıl təxribatlarına cavab olaraq keçirilmiş əks-əməliyyat zamanı qazanılmış tarixi Zəfər ordumuzun Qələbə əzmini bir daha göstərmiş oldu. Bu döyüşlər sözün həqiqi mənasında Azərbaycan xalqının qəhrəmanlığının nümayişi idi. Aprel döyüşləri həm də Azərbaycanı gələcək Qələbədə tarixi Zəfərə aparan yol idi.
Bu sözləri AZƏRTAC-a açıqlamasında Qobustan Milli Tarix-Bədii Qoruğunun direktoru Vüqar İsayev deyib.
O qeyd edib ki, Azərbaycan Ordusu Ermənistanın öz hərbi birləşmələri haqqında illərlə yaratdığı “məğlubedilməzlik” mifini darmadağın etdi.
“Aprel qələbəsi, Ordumuzun döyüş ruhunun əsl təzahürü idi. Dövlətimiz dünya ictimaiyyətinə göstərdi ki, Azərbaycan işğal edilmiş ərazilərinin hərb yolu ilə azad edilməsi əzmindədir və buna tam haqqı çatır. Uğurlu Aprel əməliyyatından sonra Ermənistanın işğalçılıq siyasəti danılmaz faktlarla yenidən təsdiqləndi. Bu döyüşlərdə Ordumuz əsl peşəkarlığını göstərmiş oldu. Aprel döyüşləri Azərbaycan xalqının və Ordusunun tarixi ərazilərimiz olan Qarabağ və ətraf rayonların işğaldan azad edilməsi üçün hər cür fədakarlığa və hərbi qüdrətə hazır olduğunu düşmənlə yanaşı, bütün dünyaya sübut etdi. Müzəffər Ali Baş Komandan İlham Əliyev Azərbaycan Ordusunun Aprel qələbələrinin ildönümü ilə əlaqədar bir qrup hərbçimizlə görüşündə deyib: “Aprel döyüşləri bizim şanlı hərbi qələbəmizdir, dövlətimizin, xalqımızın, ordumuzun gücünü göstərən qələbədir. Aprel döyüşləri nəticəsində Füzuli, Cəbrayıl və Ağdərə rayonlarının işğaldan azad edilmiş ərazilərində bu gün Azərbaycan bayrağı dalğalanır. Bu döyüşlər onu göstərir ki, Azərbaycan xalqı və dövləti heç vaxt işğalla barışmayacaq, öz ərazi bütövlüyünü nəyin bahasına olursa-olsun bərpa edəcəkdir. Bəli, dövlətimizin başçısının dediyi kimi, bu döyüşlərdə Ordumuz əlverişsiz mövqelərdən əks-hücum əməliyyatı apararaq strateji mövqelərə sahib oldu. Bu strateji yüksəkliklər və işğaldan azad edilmiş ərazilər şərait yaratdı ki, Azərbaycan Ordusu təmas xəttində mövcud vəziyyətə gələcəkdə tam nəzarət etsin və lazımi tədbirləri görə bilsin”, -deyə Vüqar İsayev söyləyib.
Direktor vurğulayıb ki, bu gün hər bir azərbaycanlı yeddi il əvvəl Lələtəpədə ucaldılan üçrəngli bayrağımızın Vətən müharibəsindəki Qələbəmizdən sonra Şuşada və digər ərazilərimizdə dalğalanmasından qürur hissi keçirir. Dövlətimizin hər bir vətəndaşı Müzəffər Ali Baş Komandanın rəhbərliyi altında əldə etdiyi tarixi Zəfərlə öyünərək fəxr edir. Azərbaycan xalqı dəmir yumruq kimi birləşərək bütün dünyaya sübut edib ki, onun iradəsini sarsıtmaq, işğalla barışmağa məcbur etmək mümkün deyil. Azərbaycan Ordusu Ermənistanın mütəmadi təxribatlarına cavab olaraq 2020-ci il sentyabrın 27-də “Dəmir yumruq” əməliyyatına başladı və noyabrın 10-dək davam etmiş 44 günlük Vətən müharibəsi nəticəsində işğalçı ölkəni diz çökməyə məcbur etdi.