“WİNTERSHALL” ŞİRKƏTİ İDARƏ HEYƏTİNİN SƏDRİ RAYNİP SVİTSERLOOTUN ÇIXIŞI
- Sabahınız xeyir, möhtərəm cənab Prezident Əliyev!
Hörmətli cənab nazir Babayev!
Hörmətli cənab nazir Qlos!
Hörmətli cənab səfir!
Hörmətli azərbaycanlı qonaqlar!
Xanımlar və cənablar!
Sizi Almaniyanın iqtisadiyyat qurumları adından Berlində salamlamaq imkanı əldə etməyimdən olduqca şadam. Bugünkü Azərbaycan-Almaniya biznes forumu uğurlu iqtisadi əlaqələrimizin intensivləşməsində növbəti bir addımdır. Hər iki tərəfdən iştirakçıların sayının belə çoxluğu Azərbaycan və Almaniya müəssisələri arasında uğurlu tərəfdaşlığı daha da genişləndirmək üçün son illərdə inkişaf edən fikir mübadiləsindən ötrü yaxşı bir əsasdır.
Möhtərəm cənab Prezident Əliyev!
Sizi Berlində salamlamağıma ürəkdən sevinirəm. Almaniya iqtisadçıları Sizi Almaniya-Azərbaycan iqtisadi münasibətlərinin inkişafına səylə və etibarlı yol açan şəxs kimi tanıyır və qiymətləndirirlər. Biz həm də ona görə şadıq ki, Siz indiki səfərinizdə Azərbaycan iqtisadiyyatını təmsil edən yüksək səviyyəli nümayəndə heyəti gətirmisiniz. Burada xüsusi vurğulandı ki, ölkələrimizin qarşılıqlı əməkdaşlığı üçün hansı potensiallar mövcuddur. Bu baxımdan, cənab Babayev, sizi də ürəkdən salamlamaq istəyirəm. Dünya iqtisadiyyatında ən sürətlə inkişaf edən ölkələrdən birinin iqtisadiyyat naziri kimi, siz ölkənizin zəngin sərvətlərindən gələn gəlirlərlə perspektiv üçün nəzərdə tutulan yatırımlara, eləcə də iqtisadiyyatın gələcəyə yönəlmiş sahələrinin inkişafına üstünlük verirsiniz. Məsələn, informasiya texnologiyaları, telekommunikasiya və enerji sahələrinə.
Azərbaycanın hörmətli sənaye nümayəndələri, sizləri ürəkdən salamlayıram. Berlində olmağınızdan və geniş fikir mübadiləsi aparmağınızdan məmnunluq duyuram. Eyni zamanda, siz bununla Almaniya müəssisələri ilə əlaqələrin qurulmasına olan marağınızı nümayiş etdirirsiniz.
Möhtərəm cənab nazir Qlos, bu biznes forumunda iştirakınıza görə sizə öz minnətdarlığımı bildirirəm. Siz xüsusilə qeyd etmisiniz ki, Almaniya hökuməti Azərbaycan ilə iqtisadi əlaqələrə çox yüksək qiymət verir.
Xanımlar və cənablar, Azərbaycanın neft hasilatı sahəsində qədim və çox zəngin ənənələri var. Dünyada sənaye üsulu ilə ilk neft hasilatçısı kimi dünya neft sənayesinin inkişafına çox müsbət təsir göstərmişdir. Hələ 1848-ci ildə birinci dəfə Azərbaycanda mexaniki üsulla ilk neft quyusu qazılmışdır. XIX əsrin sonlarında Azərbaycan ilk dəfə özünün neft bumunu
yaşadı və dünyada ən çox neft istehsalçısına çevrildi.
Xanımlar və cənablar, ötən əsrin əvvəlində dünya neftinin tam yarısı Azərbaycanda çıxarılırdı.
1991-ci ildə müstəqilliyini yenidən bərpa edəndən sonra Azərbaycan hökuməti Xəzərin dibindən neft və qaz çıxarılması üçün beynəlxalq neft və qaz şirkətlərinin ölkədə fəaliyyətini ardıcıl şəkildə həyata keçirmişdir. Həmin sərmayələr və neft hasilatının başlanması Azərbaycanda son illərdə bu sahədə yeni bir inkişafın yaranmasına, ölkənin sürətli inkişafına gətirib çıxardı. Gələcək illərdə də neft və qaz Azərbaycanın iqtisadi inkişafında əsas bünövrəni təşkil edəcəkdir. 2006-cı ilin ortalarında istifadəyə verilmiş Bakı-Tbilisi-Ceyhan neft kəməri buna əlavə təkan verdi. Bu, Azərbaycanın regionda, ümumiyyətlə, Avropada enerji təchizatı sahəsində necə önəmli rol oynadığını göstərir.
2006-cı ilin noyabrında Avropa İttifaqı ilə Azərbaycan arasında enerji məsələləri üzrə strateji tərəfdaşlığa dair anlaşma memorandumu imzalanmışdır. Avropa Komissiyasının sədri Barrozu və enerji komissarı Pyebalqs imzalanma mərasimində bu anlaşmanın Avropada enerji təhlükəsizliyi sahəsində oynadığı önəmli rolu xüsusi vurğulamışlar. Neft sahəsindəki yeni yüksəliş Azərbaycan hökuməti tərəfindən iqtisadiyyatın digər sahələrinin inkişafı və birbaşa xarici sərmayələr üçün istifadə olunacaqdır.
AZPROMO Azərbaycanda xarici sərmayədarları yüksək səviyyədə dəstəkləyir. Onların Azərbaycanda sərmayə yatırımlarını müxtəlif iqtisadi sahələrə - tikinti, telekommunikasiya və başqa sahələrə yönəltmələrini dəstəkləyir. Bu qurum lazımi konsalting xidmətləri də göstərir. Azərbaycanda neft, kənd təsərrüfatı, yeni enerji sahəsində çox böyük potensial mövcuddur. Almaniya biznesinin xüsusilə Azərbaycanda çox yaxşı nüfuzu var. Alman şirkətləri informasiya-kommunikasiya texnologiyaları sahəsində Amerikada, neft sahəsində Afrika və Asiya ölkələrində, ümumiyyətlə, alman məhsulları bütün dünyada çox müsbət nüfuza malikdir.
Xanımlar və cənablar, mən əminəm ki, bizim iqtisadi əlaqələr gələn illərdə çox sürətlə inkişaf edəcəkdir. Azərbaycanın regionda rolu getdikcə artır. İnanıram ki, Almaniya müxtəlif sahələrdə Azərbaycan iqtisadiyyatına sərmayələr qoyacaqdır. Azərbaycan bu gün öz iqtisadiyyatını çox ciddi şəkildə şaxələndirmək istəyir. Qeyri-neft sektorunu da inkişaf etdirmək arzusundadır və inanıram ki, alman biznesi bu sahədə Azərbaycana çox böyük yardım və dəstək göstərəcəkdir.
Xanımlar və cənablar, bizim kifayət qədər imkanlarımız var və bunlardan yararlanmalıyıq. Azərbaycanın da bu gün böyük iqtisadi imkanları var. Biz gərək biznes, sərmayələr barəsində informasiyanı təmin edək və birgə düşünək ki, Almaniya-Azərbaycan iqtisadi əlaqələrini hansı istiqamətdə və hansı yolla daha da inkişaf etdirək. Beləliklə, alman biznesi Azərbaycanda hansı sahələrə sərmayələrin qoyulması barədə daha da məlumatlı olmalıdır. Bütün bunları nəzərə alaraq, hesab edirəm ki, biz bir çox məlumatı əldə edəcəyik. Düşünürəm ki, bu il alman şirkətlərinin Azərbaycandakı fəaliyyəti daha da genişlənəcək və Almaniya-Azərbaycan iqtisadi münasibətləri daha da yüksək səviyyəyə qalxacaqdır.
Diqqətinizə görə minnətdaram.
X X X
Bölmənin digər xəbərləri
