Xaçmazda sel suları nəticəsində çökmüş körpünün yerində yenisi inşa olunacaq
Bakı, 15 sentyabr, AZƏRTAC
Bu gün səhər saatlarında intensiv yağıntılar nəticəsində yaranmış güclü sel suları respublika əhəmiyyətli Gəndob-Xaçmaz-Yalama-Rusiya Federasiyası ilə dövlət sərhədi avtomobil yolunun 27-ci kilometrində, Qüdyalçay üzərində yerləşən və 1974-cü ildə inşa edilmiş avtomobil körpüsünün çökməsinə səbəb olub.
Azərbaycan Avtomobil Yolları Dövlət Agentliyinin İctimaiyyətlə əlaqələr şöbəsindən AZƏRTAC-a bildirilib ki, əraziyə dərhal agentliyin əməkdaşları cəlb olunaraq əlavə təhlükəsizlik tədbirləri görülüb.
Qeyd olunub ki, agentliyin rəhbərliyi və aidiyyəti qurumların əməkdaşları tərəfindən təbii fəlakət nəticəsində çökmüş körpüyə baxış keçirilib və yerində yeni avtomobil körpüsünün inşası qərara alınıb. Bununla əlaqədar olaraq günorta saatlarında əraziyə xüsusi texnikalar cəlb edilərək işlərə başlanılacaq. Qısa müddət ərzində yeni körpünün inşasının həyata keçirilməsi nəzərdə tutulub.
Sürücülər müvəqqəti olaraq alternativ yol kimi Xaçmaz rayonunun Qımılqışlaq kəndi ərazisindən keçən yoldan istifadə edə bilərlər.
Bölmənin digər xəbərləri
