Xalq artisti Oqtay Mirqasımov “İstiqlal” ordeni ilə təltif edilib
Bakı, 12 iyun, AZƏRTAC
Azərbaycan Prezidenti İlham Əliyev iyunun 12-də Xalq artisti Oqtay Mirqasımovun təltif edilməsi haqqında Sərəncam imzalayıb.
AZƏRTAC xəbər verir ki, Sərəncamla Azərbaycan mədəniyyətinin inkişafında böyük xidmətlərinə görə Oqtay Mirəsədulla oğlu Mirqasımov “İstiqlal” ordeni ilə təltif edilib.
Qeyd edək ki, bu gün kinorejissor, Xalq artisti Oqtay Mirqasımovun 80 yaşı tamam olur. O, 1943-cı il iyun 12-də Bakı şəhərində anadan olub. 1963-1968-ci illərdə Moskvada ÜDKİ-nin rejissorluq fakültəsində təhsil aldıqdan sonra Bakıya "Azərbaycanfilm" kinostudiyasına qayıdıb. Bir neçə sənədli, bədii filmlərin quruluşçu rejissoru və ssenari müəllifidir. Filmləri Ümumittifaq festivallarında mükafat alıb. 1993-2001-ci illərdə "Azərkinovideo" İstehsalat Birliyinin baş direktoru vəzifəsində çalışıb. 2015-ci ildə Cəfər Cabbarlı mükafatına layiq görülüb. 2018-ci ildə “Şərəf” ordeni ilə təltif edilib.
Bölmənin digər xəbərləri
