Xankəndidə Dövlət Bayrağımızın ucaldılması kimi tarixi missiyanı Prezident İlham Əliyev gerçəkləşdirdi - Ekspert
Bakı, 21 oktyabr, AZƏRTAC
Qarabağ regionunda separatçı rejimin qurulmasının tarixi Azərbaycanın müstəqillik illərinə paraleldir. Belə ki, Azərbaycanın dövlət müstəqilliyi haqqında Konstitusiya Aktı 1991-ci il oktyabrın 18-də qəbul edilib. Bundan cəmi 2 ay sonra - 1991-ci il dekabrın 10-da Qarabağ regionunda azərbaycanlıların boykot etdiyi, yalnız erməni sakinlərin qatıldığı qondarma referendum keçirildi. Nəticədə qondarma “Dağlıq Qarabağ respublikası”nın "müstəqilliyi”nə qərar verildi. 1992-ci il yanvarın 6-da isə separatçı rejim qondarma respublikanın “müstəqilliyi”ni rəsmən elan etdi. Ardınca isə Ermənistanın silahlı qüvvələri keçmiş Dağlıq Qarabağ ətrafında yerləşən rayonları işğal etməyə başladılar. Beləliklə, beynəlxalq aləm tərəfindən həm Xalq Cümhuriyyəti, həm sovet Azərbaycanı, həm də müstəqil Azərbaycan Respublikası dövründə ölkəmizin tərkib hissəsi kimi tanınmış bu bölgədə - Qarabağda və onun inzibati mərkəzi sayılan Xankəndi şəhərində müstəqil Azərbaycanın Dövlət Bayrağını yüksəltmək mümkün olmadı.
Bu sözləri AZƏRTAC-a açıqlamasında Mətbuat Şurasının İdarə Heyətinin üzvü, media eksperti Müşfiq Ələsgərli söyləyib.
Ekspertin sözlərinə görə, bu tarixi missiyanı ilk dəfə Prezident İlham Əliyev gerçəkləşdirdi: de-yure Azərbaycan Respublikasının tərkib hissəsi kimi tanınan Qarabağ regionunu və Xankəndi şəhərini işğaldan azad etdi. “Dövlətimizin başçısı Xankəndi şəhərinin tarixi adını özünə qaytardı, orada da Azərbaycanın suverenliyini bərpa etdi. Nəhayət bir neçə gün əvvəl Xankəndidə Azərbaycanın rəsmi atributları yerləşdirildi, Dövlət Bayrağı qaldırıldı. Nəticədə müstəqil Azərbaycan öz tarixində ilk dəfə olaraq bütövləşdi, öz ərazisində suverenliyini tam təmin etdi. Bu baxımdan deyə bilərik ki, Prezident İlham Əliyevin Xankəndi şəhərinə səfər etməsi, burada Dövlət Bayrağını dalğalandırması ilə Azərbaycan tarixində yeni bir səhifə açıldı. Bu səhifənin ilk qeydlərini Prezident özü yazdı. Yeni tariximiz qalibiyyət, inkişaf, bacarıqlar üzərində quruldu”, - deyə o qeyd edib.
Müşfiq Ələsgərlinin sözlərinə görə, Prezidentin Xankəndi şəhərində etdiyi çıxış, Azərbaycan xalqına ünvanladığı müraciət də orada Dövlət Bayrağımızın qaldırılması qədər əlamətdardır. Dövlətimizin başçısı bu çıxışında Qarabağda separatçı hərəkatın genişləndirilməsi, Ermənistanın işğalçılıq siyasətinə zəmin hazırlanması üçün istifadə olunmuş mexanizmlərə işıq saldı. Bu prosesə stimul vermiş daxili və xarici düşmənlərin kimliyini tanıtdı. Qeyd etdi ki, 1990-cı illərdə Ermənistanın arxasında dayanıb onu Azərbaycan torpaqlarını işğal etməyə cəsarətləndirən dövlətlər bu gün də ölkəmizlə düşmənçilik, rəsmi İrəvanla dostluq edirlər. Azərbaycan Prezidentinin Xankəndidə söylədiyi nitq bütövlükdə bu cür tezislərlə zəngindir. Eyni zamanda, bu nitq Azərbaycan xalqına dostu ilə düşmənini fərqləndirə bilmək üçün istiqamət verir.
Bölmənin digər xəbərləri
