Xarici bazarlarda Azərbaycan meyvəsinə böyük tələbat var – Astaranın feyxoa bağından REPORTAJ VİDEO
Astara, 14 oktyabr, İsmayıl Cəfərli, AZƏRTAC
Cənub bölgəsinin ən böyük sitrusçuluq rayonu olan Astarada dadlı, ətirli meyvə olan feyxoanın yığımına başlanılıb. Bu il əlverişli hava səbəbindən məhsul boldur. Fermerlər bağlardan yığdıqları feyxoanı yerli bazarlarla yanaşı, Rusiya bazarlarına da göndərirlər.
AZƏRTAC xəbər verir ki, bu il sentyabrda yağışların yağması sitrus bağları üçün əlverişli olub. Bir ağacdan 25 kiloqramdan 100 kiloqrama qədər məhsul yığmaq mümkün olacaq. Hər təsərrüfatdan isə orta hesabla 4-6 ton məhsul gözlənilir. Astaranın Kijəbə qəsəbəsinin sakini, fermer Ağadadaş Qənbərov deyir ki, sitrus bağlarının məhsuldarlığı ötənilkindən çoxdur: “Kijəbə kəndində əsas məşğuliyyətimiz sitrus meyvələri yetişdirməkdir. Rayon üzrə ən böyük məhsuldarlıq da bizim qəsəbəmizdə olur. Bu il çox gözəl məhsul var. Bu ağaclar 50 ilin ağaclarıdır. 40, 50, 60, hətta 100 kiloqram məhsul verən ağaclarımız var”.
Sitrus bağlarında meyvə yığımının başlanması yerli sakinlərin məşğulluğuna da müsbət təsir göstərib. Sakinlər bağlarda feyxoa yığaraq gündəlik qazanc əldə edirlər.
Onlardan biri də Könül İxtiyarovadır. “Bağlarda feyxoa boldur. Əsasən iri feyxoaları yığırıq. Gündəlik qazancımızı əldə edirik. Məndən başqa bu bağda 10 nəfər də işləyir. 7-8 saata 100-150 kiloqram feyxoa yığırıq”, - deyə o bildirib.
Digər işçi Gülzar Rzayeva isə deyir ki, 10 ildir bu bağda işləyir: “Yayda ağaclara baxırıq. Diblərini yumşaldır, su veririk. Payız başlayanda da meyvəsini yığırıq. Mandarin və naringi bağlarında da işləyirik”.
Feyxoanın hazırkı qiyməti təsərrüfat sahiblərinin ürəyincədir. Onların sözlərinə görə, feyxoaya tələbat həmişə var. İlk mərhələdə qiymətlər yüksək olduğuna görə bu dövrdə məhsul daha çox ixrac edilir. Tədarükçü İlqar Əhmədov bildirir ki, xarici bazarlarda Azərbaycan meyvəsinə böyük tələbat var: “Məhsulu Rusiya şəhərlərinə göndəririk. Builki məhsuldarlıq keçənilkindən çox yaxşıdır. Keçən il Rusiya bazarlarına 40-50 ton meyvə çıxarmışdıq. Bu il isə yeni başlasaq da, artıq 5-6 ton məhsul göndərmişik. Bizim məhsullar dərmansız yetişdirilir, təbii meyvələrdir. Ona görə də Rusiya bazarlarında bu meyvələrə böyük tələbat var”.
Cənub bölgəsində tezyetişən feyxoanın yığımı oktyabrın axırlarınadək, ümumi yığım isə növündən asılı olaraq dekabradək davam edəcək.
Astarada olan 3835 hektar sitrus meyvə bağlarının 750 hektarı feyxoa sahələridir.
Bölmənin digər xəbərləri
