Xarici dövlət qeydiyyat nişanlı avtomobillərə ölkədaxili daşımaların həyata keçirilməsi qadağan edilir
Bakı, 12 iyun, AZƏRTAC
“Avtomobil nəqliyyatı haqqında” Qanuna dəyişikliklərdə müəyyən qayda və qadağalar öz əksini tapıb.
AZƏRTAC xəbər verir ki, bununla bağlı məsələ Milli Məclisin İqtisadi siyasət, sənaye və sahibkarlıq komitəsinin iyunun 12-də keçirilən iclasının gündəliyinə daxil edilib.
Dəyişikliyə əsasən xarici dövlət qeydiyyat nişanlı avtomobil nəqliyyatı vasitəsilə ölkədaxili sərnişin və yükdaşımalarının həyata keçirilməsi qadağandır.
Sənəddə beynəlxalq sərnişin və yükdaşımalarında taxoqrafdan istifadə qaydalarına görə, operatorların beynəlxalq daşımaları həyata keçirən avtonəqliyyat vasitələrini taxoqrafla təchiz etmələri tələb olunur.
Operatorlar və beynəlxalq daşımaları yerinə yetirən sürücülər tərəfindən müvafiq daşımaların taxoqraf olmadan, habelə taxoqrafın yoxlanması haqqında şəhadətnamə və ya müvafiq möhür olmadan, yaxud yoxlanma müddəti bitmiş və ya plomblanması pozulmuş, tamamilə və ya hər hansı funksiyası işləməyən taxoqrafla, taxoqrafın qeydiyyata aldığı məlumatlar saxtalaşdırılmaqla yerinə yetirilməsinə yol verilmir.
Bölmənin digər xəbərləri
