Xəbərdarlıq: Azərbaycanın e-mail istifadəçilərinə viruslu məktublar göndərilir
Bakı, 21 noyabr, AZƏRTAC
Son zamanlar Azərbaycan üzərində bir sıra spam və yoluxmuş faylların tranzaksiyasında aktivlik müşahidə olunur.
Rabitə və Yüksək Texnologiyalar Nazirliyindən AZƏRTAC-a bildirilib ki, müxtəlif ölkələr üzərindən IP ünvanlarla, o cümlədən mail hosting və mail istifadəçiləri tərəfindən ölkəmizdəki e-mail istifadəçilərinə “my new photo” mövzusunda olan və “my_photo.zip”, “iphone_photo.zip” , “photo.zip”, “transact_store.zip” və digər bu kimi əlavələrlə (attachment) viruslu məktublar göndərilir.
Bununla əlaqədar olaraq Azərbaycan Xüsusi Dövlət Mühafizə Xidmətinin Xüsusi Rabitə və İnformasiya Təhlükəsizliyi Dövlət Agentliyinin Kompyuter İnsidentlərinə qarşı Mübarizə Mərkəzi e-mail istifadəçilərini diqqətli olmağa çağırır və onlara bu kimi mailləri açmamaq və dərhal silməklə bağlı xəbərdarlıq edir.
Mərkəzin xəbərdarlığında qeyd olunur ki, “bu kimi maillərin alınması və əlavədəki faylların açılması sizin kompyuterinizi və məlumatlarınızı, o cümlədən, qurumunuzun, təşkilatınızın, şirkətinizin şəbəkəsindəki digər kompyuter və ya hər hansı informasiya daşıyıcı və vasitələrini təhdid qarşısında qoyur”.
Bölmənin digər xəbərləri
