“XƏZƏR–LƏNKƏRAN” LİDERLİYƏ YÜKSƏLMİŞDİR
AZƏRTAC xəbər verir ki, mayın 17-də ölkə futbol çempionatında 25-ci turun oyunları olmuşdur.
Turun ən qeyri-adi nəticəsi “Şəfa” stadionunda qeydə alınmışdır.
Bu il qızıl medalları qazanmağı qarşısına məqsəd qoyan “Neftçi” çempionatın sonuna bir tur qalmış “Olimpik”ə 1:2 hesabı ilə məğlub olmuşdur. Görüşün əvvəlində Rəşad Sadıxov 11 metrlik cərimə zərbəsindən “Neftçi”ni hesabda irəli çıxarsa da, ikinci hissədə “Olimpik” Pathe Banqura və Xəqani Məmmədovun vurduqları qollar sayəsində qələbə qazanmışdır. Qeyd edək ki, bu “Neftçi”nin ikinci dövrədə ilk məğlubiyyətidir.
Digər oyunda isə “Xəzər-Lənkəran” Şahdağ” üzərində 3:1 hesabı ilə qələbə qazanaraq liderliyə yüksəlmişdir. Sumqayıtda isə “Gənclərbirliyi” “Gilan”a 0:1 hesabı ilə uduzmuşdur.
Hazırda “Xəzər-Lənkəran” 53 xalla turnir cədvəlində birinci yeri tutur. 51 xala malik “Neftçi” ikinci yerdədir.
Mayın 23-də sonuncu turun oyunlarında “Xəzər-Lənkəran” səfərdə “Gilan” üzərində qələbə qazanacağı təqdirdə ilk dəfə Azərbaycan çempionu tituluna sahib çıxacaqdır. “Neftçi” isə həmin gün öz meydanında “Turan”ı qəbul edəcəkdir.
Bölmənin digər xəbərləri
