Xəzərin Azərbaycan sektorunda 3 dənizdibi seysmik stansiya quraşdırılacaqdır
Bakı, 19 mart (AZƏRTAC). Ötən il 7 min 761 yeraltı təkan qeydə alınmışdır. Onlardan 3 min 840-ı yaxın, 3 min 921-i uzaq zəlzələdir. Zəlzələlərin 17-si hiss olunmuşdur. Zəif zəlzələlərin sayının çoxalması seysmik stansiyaların sayının artması ilə əlaqədardır.
AZƏRTAC xəbər verir ki, bu rəqəmlər Azərbaycan Milli Elmlər Akademiyası Respublika Seysmoloji Xidmət Mərkəzinin (RSXM) hesabatında əks olunmuşdur.
Hesabatda bildirilir ki, hazırda RSXM-də 17 yeni peyk rabitəli telemetrik seysmik stansiya fəaliyyət göstərir. Təkcə 2011-ci ildə 7 seysmik stansiya açılmışdır ki, bu stansiyalardan 3-ü Naxçıvan Muxtar Respublikasında, 4-ü isə Qobustan, Qəbələ, Qusar (Həzrə) və Quba (Xınalıq) rayonlarının ərazisində yerləşir. Bununla yanaşı, Xəzər dənizinin Azərbaycan sektorunda 3 dənizdibi seysmik stansiyanın quraşdırılması cari ilin II rübündə başa çatdırılacaqdır.
Bölmənin digər xəbərləri
