XİN: Ukraynadakı vəziyyətlə əlaqədar bu ölkədən Azərbaycana indiyədək 4375 nəfər təxliyə edilib
Bakı, 8 mart, AZƏRTAC
Ukraynadakı vəziyyətlə əlaqədar bu ölkədəki Azərbaycan vətəndaşlarının qonşu dövlətlərin ərazisindən keçməklə respublikamıza təxliyəsi davam edir.
Xarici İşlər Nazirliyinin Mətbuat xidməti idarəsindən AZƏRTAC-a bildiriblər ki, martın 8-dək Azərbaycana 4375 nəfər (son sutka ərzində 1237 nəfər olmaqla) təxliyə olunub. Onların arasında çarter reysləri ilə təxliyə edilənlər 2298, quru yolu ilə təxliyə olunanlar isə 2077 nəfər təşkil edib.
Vətəndaşlarımızın təxliyəsi üçün Azərbaycan hökuməti tərəfindən əksəriyyəti Rumıniyanın Yassi şəhərindən olmaqla, Rumıniya və Polşa ərazisindən indiyədək 12 çarter reysi təşkil olunub. Azərbaycan vətəndaşlarının həm çarter reysləri, həm də qonşu ölkələrin ərazisindən keçməklə avtobuslarla təxliyəsi davam edir.
Bölmənin digər xəbərləri
