Xırdalanda vətəndaşlara 1000-ə yaxın tut tingi paylanılıb
Bakı, 3 dekabr, AZƏRTAC
Ölkədə yaşıllıqların artırılmasına töhfə vermək məqsədilə Ekologiya və Təbii Sərvətlər və Kənd Təsərrüfatı nazirliklərinin birgə təşkilatçılığı ilə dekabrın 3-də Xırdalan şəhərində əhaliyə tut tinglərinin paylanması yarmarkası keçirilib.
AZƏRTAC xəbər verir ki, Abşeron Dövlət Aqrar İnkişaf Mərkəzinin qarşısında keçirilən yarmarka zamanı vətəndaşlara nazirliyin tinglik sahələrində yetişdirilən tut tingləri paylanılıb.
Ekologiya və Təbii Sərvətlər Nazirliyinin ekoloji maarifləndirmə şöbəsinin müdiri Səyyarə Məmmədova bildirib ki, tinglərin paylanılmasına noyabrdan start verilib və ərazilərin iqlim şəraitinə uyğun olaraq müxtəlif növ tinglər paylanılıb: “Bu günə kimi bir çox bölgədə, eyni zamanda, Bakı və Abşeron ərazisinin müxtəlif yerlərində - marketlərin qarşısında, yanacaqdoldurma məntəqələrində bu cür aksiyalar keçirilib. Bu gün də Xırdalan şəhərində belə bir yarmarka təşkil olundu və vətəndaşlara 1000-ə yaxın tut tingi paylanıldı. Bildiyimiz kimi tut ağacı Abşeron yarımadasının mülayim və quru iqlimi üçün xarakterikdir. Azərbaycanda bir çox növləri yayılıb, eyni zamanda, qiymətli bitki kimi respublikanın əksər rayonlarında çox qədimdən becərilir. Ümumilikdə, yarmarkanın məqsədi ağac əkmək istəyən hər kəsi tinglərlə təmin etməklə onlara dəstək olmaq, təbiətə töhfə vermək və insanlarda təbiətə səmimi münasibət formalaşdırmaqdır. Ümid edirik ki, vətəndaşlar bu fürsətdən yararlanacaq, tinglərə qulluq edib onları yetişdirəcəklər. Bununla da həm ölkəmizin yaşıllaşdırılmasında pay sahibi olacaqlar, həm də əkdikləri ağacların bəhrəsini görəcəklər”.
Xırdalan şəhər sakini olan Vətən müharibəsi qazisi Xəqani Muradov deyib: “Vətən müharibəsində Cəbrayıl, Qubadlı, Zəngilan rayonları, Xocavənd rayonunun Hadrut qəsəbəsi uğrunda döyüşlərdə iştirak etmişəm. Qubadlı uğrunda döyüşlərdə snayperlə vuruldum və ağır yaralandım. Rayonlarımızı azad etdikcə dəhşətli mənzərə ilə qarşılaşırdıq. İşğalçılar ağacları, meşələri də məhv etmişdilər. Azərbaycan xalqı isə qurub-yaradan xalqdır. Belə aksiyalar xalqımızın xeyirxah niyyətini bir daha bəyan edir. Təşkilatçılara minnətdaram ki, vətəndaşlara öz həyətlərində meyvə ağacı əkməsi üçün belə şərait yaradıblar. Mən də bir vətəndaş kimi tut tinglərinin paylanıldığını eşidəndə bu fürsətdən yararlanmağa qərar verdim. Həmin tingləri öz həyətimizdə əkəcəyəm. Sevindiricidir ki, ağacəkmə aksiyaları azad edilmiş ərazilərimizdə davam edir. Ümid edirəm ki, uğrunda döyüşdüyüm torpaqların ətraf mühitinin də bərpasında iştirak etmək və həmin ərazilərdə də ağac əkmək nəsib olar. Arzu edirəm ki, məcburi köçkünlərimiz öz dədə-baba yurdlarına qayıdıb həyət-bacalarında ağac əksinlər, rayonlarımızda həyat yenidən canlansın, həmin torpaqlar əvvəlki kimi yaşıllıqlara qərq olsun. Düşmənləri torpaqlarımızdan qovduğumuz kimi, onların vəhşiliklərinin izlərini də silməyə nail olacağımıza inanıram”.
Abşeron rayon mədəniyyət şöbəsinin müdiri, Əməkdar mədəniyyət işçisi İlham Manafov tut tinglərinin paylanılması təşəbbüsünü yüksək qiymətləndirib və təşkilatçılara minnətdarlığını bildirib.
Bölmənin digər xəbərləri
