Xocalı soyqırımı ümumbəşəri faciədir
Paris, 3 dekabr, AZƏRTAC
Dünya şöhrətli fotoqraf Reza Deqatinin Parisdə Azərbaycana həsr olunan fotosərgisini ziyarət edən xanım Jizel Vatremez aldığı təəssürat barədə AZƏRTAC-ın müxbirinə müsahibə verib. O deyib: “Sərgidə ölkənizlə bağlı nümayiş etdirilən fotolar arasında bir neçəsi mənim diqqətimi daha çox cəlb etdi. Həmin əsərlərdə Xocalı soyqırımı təsvir edilib. Bu fotolar mənim diqqətimi xüsusi olaraq ona görə cəlb etdi ki, fransız xalqı da vaxtilə belə bir soyqırımı yaşayıb. İkinci Dünya müharibəsi zamanı Fransanın Kiçik Oradur kəndində qətliam törədilib, əhalisi bir nəfər kimi amansızlıqla qətlə yetirilib. O kənddən yalnız altı nəfər xilas olmağa macal tapıb”.
J.Vatremez bildirib ki, XX əsrin sonlarında Xocalı şəhəri də həmin dəhşətli anları yaşayıb. Bildiyimə görə, Azərbaycana qarşı işğalçılıq siyasəti yürüdən Ermənistan silahlı qüvvələri yerli əhaliyə vəhşicəsinə divan tutub, hətta günahsız insanlara - qadınlara, uşaqlara və yaşlılara belə aman verməyiblər. Xocalı soyqırımı ümumbəşəri faciədir. Bir insan kimi deyə bilərəm ki, dünyanın sülhsevər ictimaiyyəti bu faciəyə göz yummamalı idi. Siyasi dairələrin seyrçi münasibəti və insanları dəhşətə gətirən bu faciəyə siyasi qiymət verməməsi təəssüf hissi doğurur. İnsanlıq naminə, gələcək naminə belə faciələr bir daha təkrar olunmamalıdır. Bütün xalqlar sülh şəraitində yaşamalıdırlar.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
