Yanvarın 20-də polis gücləndirilmiş iş rejimində işləyəcəkdir
Bakı, 16 yanvar (AZƏRTAC). Yanvarın 20-də respublikanın daxili işlər orqanları gücləndirilmiş iş rejimində işləyəcəklər.
Daxili İşlər Nazirliyinin mətbuat xidmətindən AZƏRTAC-a bildirmişlər ki, bununla bağlı daxili işlər naziri, general-polkovnik Ramil Usubov müvafiq əmr imzalamışdır.
Əmrə əsasən, 20 Yanvar faciəsinin 23-cü ildönümü ilə əlaqədar keçiriləcək tədbirlər və mərasimlər zamanı ictimai qaydanın və təhlükəsizliyin təmin edilməsi məqsədi ilə yanvarın 20-də ölkənin daxili işlər orqanlarının və Daxili Qoşunların şəxsi heyəti gücləndirilmiş iş rejimində fəaliyyət göstərəcəkdir.
20 Yanvar faciəsi ildönümünün qeyd olunması ilə əlaqədar Şəhidlər xiyabanına ziyarətə gələn vətəndaşlarımızın sərbəst və maneəsiz hərəkət etmələri, eləcə də onların təhlükəsizliyinin təmin olunması üçün polis əməkdaşları qüvvələrini səfərbər edəcəklər.
Həmin gün nəqliyyatın hərəkəti məhdudlaşdırılacaq, tıxacların yaranması ehtimal olunan ərazilər əvvəlcədən müəyyən edilərək qarşısının alınması məqsədi ilə qabaqlayıcı tədbirlər görüləcəkdir.
Bölmənin digər xəbərləri
