YAPONİYA, ABŞ VƏ AVSTRALİYA ÇİN TƏHDİDİNİ MÜZAKİRƏ EDİR
AZƏRTAC “Novosti” agentliyinə istinadla xəbər verir ki, Yaponiya, ABŞ və Avstraliya xarici işlər nazirləri səviyyəsində danışıqlar aparırlar. Danışıqların başlıca mövzusu Çinin iqtisadi və hərbi qüdrətinin artması ilə bağlıdır. Bundan əlavə, Taro Aso, Aleksandr Dauner və Kondoliza Rays ölkələrinin terrorizmlə mübarizədə birgə fəaliyyətini, İranın və Şimali Koreyanın nüvə problemlərini, habelə Yaponiya və Avstraliya hərbi kontingentlərinin İraqdan martın axırlarına nəzərdə tutulan çıxarılması planını müzakirə edir. Gözlənilir ki, bu dövlətlərin qoşunlarının iki mərhələdə çıxarılması iyunda başa çatacaqdır.
Bundan əvvəl bildirilmişdi ki, 2006-cı ildə Çinin hərbi büdcəsi 35 milyard dollar, yaxud ümumi büdcənin 7,4 faizi qədər olub, ötən illə müqayisədə 14,7 faiz artırılacaqdır. ÇXR-in öz nüvə silahını modernləşdirməsi, Hərbi Hava Qüvvələri və Hərbi Dəniz Qüvvələri üçün Rusiyadan ən müasir hərbi texnika alması ABŞ-ı xüsusilə narahat edir.
Bölmənin digər xəbərləri
