YAPONİYA HÖKÜMƏTİ YODLAŞDIRILMIŞ MƏHSUL İSTEHSAL EDƏCƏK ZAVODUN TİKİNTİSİ ÜÇÜN QRANT AYIRMIŞDIR
Martın 13-də Səhiyyə Nazirliyində 2000-ci ildə Yaponiya hökümətinin Asiya İnkişaf Bankında yaratdığı struktur bölmə-Yoxsulluğun Aradan Qaldırılması üzrə Yaponiya fondu tərəfindən Azərbaycana yodlaşdırılmış duz və taxıl istehsalı zavodunun tikintisi üçün 850 min dollar məbləğində qrant ayırması barədə saziş imzalanmışdır. İmzalanma mərasimində Yaponiyanın Azərbaycandakı səfiri Tetsuya Xirose, Asiya İnkişaf Bankının regional nümayəndəsi Qiirt van der Linden, YUNİSEF-in Azərbaycandaki nümayəndəliynin başçısı Akif Saatçıoğlu, Səhiyyə Nazirliyi kolleqiyasının üzvləri iştirak edirdilər.
İmzalanma mərasimindən qabaq keçirilmiş görüşdə səhiyyə naziri Əli İnsanov bildirdi ki, 1998-ci ildə Azərbaycan Prezidenti Heydər Əliyevin Yaponiyaya rəsmi səfərindən sonra Azərbaycan-Yaponiya əlaqələrinin inkişafı bütün sahələrdə yeni səviyyəyə çıxmışdır. Həmin səfər zamanı bir sıra dövlətlərarası sazişlər imzalanmışdır. Yaponiya iqtisadi problemlərin həllində, əhalinin sosial vəziyyətinin, səhiyyə xidmətinin yaxşılaşdırılmasında Azərbaycana hərtərəfli və təmənnasız yardım göstərən bir neçə ölkədən biridir. Son illər Yaponiya höküməti ölkənin səhiyyə xidmətinin ehtiyacları üçün 6 milyon dollar məbləğində vəsait ayırmışdır. Həmin vəsait sayəsində MDB ərazisində ən yaxşı müalicə-profilaktika müəssisələrindən birinə çevrilmiş Ağ Ciyər Xəstəlikləri Xəstəxanası tamamiilə bərpa olunmuş, Şamama Ələskərova adına 5 nömrəli doğum evi, Ə.F.Qarayev adına 2 nömrəli birləşmiş uşaq klinik xəstəxanası ən müasir avadanlıqla təchiz olunmuşlar.
Hazirda M.Ə.Mirqasımov adına Respublika klinik xəstəxanasında yenidənqurma işləri həyata keçirilir. Yaponiyadan buraya avadanlıq gətiriləcəkdir.
Nazir Azərbaycan üçün çox kəskin bir problemin - yod çatışmazlığı probleminin aradan qaldırılmasına yönəldiləcək vəsait ayırdığı üçün Yaponiya hökumətinə və Asiya İnkişaf Bankına minnətdarlığını bildirdi. Ölkənin bəzi regionlarında yod və dəmir çatışmazlığı problemi xüsusən aktualdır və son nəticədə fiziki və əqli inkişafdan geri qalmağa, immunçatışmazlığına gətirib çıxarır. Belə hallarda qadınlarda və uşaqlarda daha ağır fəsadlar müşahidə olunur. Azərbaycan hökuməti bu problemin həllinə kömək etmək üçün beş il ərzində bir çox beynəlxalq təşkilatlara dəfələrlə müraciət etsə də heç bir nəticəsi olmamış, əvvəllər olduğu kimi, yenə də Yaponiya hökuməti yardımını təklif etmişdir.
Əli İnsanov ölkənin səhiyyə sisteminə daim qayğı göstərdiyinə görə Azərbaycan Prezidenti Heydər Əliyevə öz minnətdarlığını bildirdi.
Sonra çıxış edən Yaponiyanın Bakıdakı səfiri Tetsuya Xirose xatırlatdı ki, Azərbaycan 1999-cu ilin dekabrından Asiya İnkişaf Bankının üzvü olmuşdur və bu bankın Azərbaycandakı fəaliyyətinin öncül istiqaməti səhiyyədir. Mini-zavodun tikintisi ilə yanaşı, qrantın müəyyən hissəsi mikroelementlər çatışmazlığına mübtəla olmuş regionların əhalisi arasında maarifçilik işinə sərf ediləcəkdir. Səfir səhiyyə sisteminin təkmilləşdirilməsi sahəsində Azərbaycanda görülmüş işlər barədə danışarkən bildirdi ki, Yaponiya gələcəkdə də bu sektorun inkişafına kömək edəcəkdir.
Asiya İnkişaf Bankının nümayəndəsi Qiirt van der Linden vurğuladı ki, 2001-ci ilin aprel ayında bank yod çatışmazlığını aradan qaldırmaq üçün Orta Asiya ölkələri və Monqolustan üçün 6 milyon dollar dəyərində layihə işləyib hazırlamışdır. Həmin sazişi imzalamaqla Azərbaycan da bu proqrama qoşulur. Cənab Linden ümidvar olduğunu bildirdi ki, bu layihənin həyata keçirilməsi özəl sektorun inkişafına təkan verəcəkdir. Asiya İnkişaf Bankı Azərbaycanda 7 layihəyə, əsasən qeyri-neft sektoru ilə bağlı layihələrə 5,3 milyon dollar vəsait ayırmışdır. Layihələr qaçqınların və məcburi köçkünlərin həyat şəraitinin yaxşılaşdırılmasına, yolların yenidən qurulmasına, kənd təsərrüfatında islahatlar aparılmasına yönəldilmişdir. Bu layihələrdən ikisi Yaponiya hökuməti tərəfindən maliyyələşdirilir. Hazırda bank Azərbaycan üçün 2 kredit layihəsi hazırlamağa başlamışdır. Onlardan biri - 20 milyon dollar məbləğində olan layihə uşaqların inkişafına yönəldiləcəkdir.
Cənab Linden vurğuladı ki, Yoxsulluğun Aradan Qaldirilmasi üzrə Yaponiya Fondu 2000-ci ildə Yaponiya hökumətinin təşəbbüsü ilə Asiya İnkişaf Bankının bir qurumu kimi yaradılmışdır. Hökumət əhalinin ən yoxsul təbəqələrinin sosial vəziyyətini yaxşılaşdırmaq üçün ayrı-ayrı ölkələrə qrant kimi 155 milyon ABŞ dolları ayırmışdır.
Sonra səhiyyə naziri Əli İnsanov və cənab Linden sazişi imzaladılar.
Əli İnsanov jurnalistlərə bildirdi ki, zavodun məhsulu yod çatışmazlığı müşahidə edilən regionların əhalisi, əsasən, qadınlar və uşaqlar arasında pulsuz yayılacaqdır.
Bölmənin digər xəbərləri
