YAPONİYA HÖKUMƏTİNİN YARDIMI İLƏ REALLAŞDIRILAN DAHA BİR LAYİHƏ BAŞA ÇATMIŞDIR
Yaponiya hökumətinin “Ot kökləri və İnsan Təhlükəsizliyi” Qrant Proqramı çərçivəsində Xaçmaz rayonunda “quş qripinə” qarşı mübarizə tədbirlərinin gücləndirilməsi layihəsi başa çatmışdır.
Yaponiyanın ölkəmizdəki səfirliyindən AZƏRTAC-a bildirmişlər ki, oktyabrın 2-də Xaçmaz rayonunun taun əleyhinə laboratoriyasında bu münasibətlə mərasim keçiriləcəkdir. Mərasimdə səfirliyin birinci katibi Mitsuhiro Kohno və Xaçmaz Rayon İcra Hakimiyyətinin başçısı Şəmsəddin Xanbabayevin çıxışı nəzərdə tutulmuşdur.
Bu layihə üzrə qrant müqavilə səfirliklə adı çəkilən laboratoriya arasında ötən il noyabrın 14-də imzalanmışdır. Layihənin məqsədi Xaçmazda və ətraf rayonlarda “quş qripinə” qarşı mübarizə tədbirlərini gücləndirməkdir. Mütəxəssislərin hesablamalarına görə, 55 min 957 ABŞ dolları dəyərində olan layihədən 144 min nəfər faydalanacaqdır. Xatırladaq ki, laboratoriya 148 kəndi əhatə edir.
Layihə “quş qripinə” qarşı mübarizə sahəsində Yaponiya hökumətinin göstərdiyi hərtərəfli yardımın bir hissəsdir. İndiyədək bu bəlaya qarşı mübarizə ilə bağlı dost ölkə “Ot Kökləri və İnsan Təhlükəsizliyi” Qrant Proqramı çərçivəsində Sabirabad, Lənkəran, Xanlar, Naxçıvan, Xaçmaz və İmişli laboratoriyalarını müvafiq avadanlıqla təchiz etmişdir. Bundan əlavə, azərbaycanlı mütəxəssislər Yaponiyanın Beynəlxalq Əməkdaşlıq Agentliyinin təşkil etdiyi müvafiq təlimlərdə iştirak etmişlər.
Bölmənin digər xəbərləri
