YAPONİYA XARİCİ İŞLƏR NAZİRİNİN BİRİNCİ MÜAVİNİ İÇİRO AİSAVA SƏNGƏÇAL TERMİNALI İLƏ TANIŞ OLMUŞDUR
AZƏRTAC xəbər verir ki, respublikamızda rəsmi səfərdə olan Yaponiyanın xarici işlər nazirinin birinci müavini İçiro Aisava yanvarın 15-də Səngəçal terminalında olmuşdur.
Yaponiyanın “İtoçu” şirkəti “Əsrin müqaviləsi”nin, həmçinin Xəzər dənizinin Azərbaycan sektorunda karbohidrogen ehtiyatların işlənilməsi üzrə imzalanmış beynəlxalq sazişlərin iştirakçısıdır. Şirkət “Azəri-Çıraq-Günəşli” yataqlarının tammiqyaslı işlənilməsi layihəsinin “Hasilatın pay bölgüsü Sazişi”ndə 3,9 faiz iştirak payına, Bakı-Tbilisi-Ceyhan layihəsində isə 3,40 faiz səhmə malikdir.
Dövlət Neft Şirkətinin və bp-nin nümayəndələri qonağa Səngəçal terminalının tikintisi, genişləndirilməsi proqramı barədə ətraflı məlumat vermişlər. Qeyd olunmuşdur ki, terminal neft-qaz layihələrinin birləşdiyi, qovuşduğu yerdir. Onun yeni layihə üzrə tikintisinə 2001-ci ilin noyabr ayından başlanmış, indiyədək burada 18 milyon iş saatı sərf olunmuşdur. Bu, dünya rekordu sayıla biləcək bir hadisədir. Tikintidə 3500 nəfər çalışır. Terminalda hər birinin tutumu 880 barrel olan 3 xam neft çəninin, baş nasos stansiyasının, separatorların, idarəetmə məntəqəsinin tikintisi, sahildən 187 kilometr aralıda yerləşən “Mərkəzi Azəri” yatağından terminala qədər sualtı neft və qaz kəmərlərinin, fiber-optik rabitə kabellərinin çəkilişi, birləşdirmə və sınaq işləri tamam başa çatdırılaraq hazır vəziyyətə gətirilmişdir.
Terminalla ətraflı tanış olan yaponiyalı diplomat burada görülmüş işlərin səviyyəsindən razı qaldığını bildirmişdir.
Qonağa Bakı-Tbilisi-Ceyhan neft ixrac boru kəmərinin tikintisi barədə də məlumat verilmişdir. Dünyanın ən nəhəng layihələrindən birinin tikintisinin iki aya kimi başa çatacağı, layihənin gücü, regionda yeni coğrafi-siyasi vəziyyətin formalaşmasına təsiri haqqında deyilənlər qonaqda xoş təəssürat yaratmışdır. O, ölkəsinin belə irimiqyaslı layihələrin iştirakçısı olmasından qürur duyduğunu söyləmişdir.
Burada gördüklərinə və mehribanlıqla qarşılandığına görə minnətdarlıq edən İçiro Aisava ölkəsinin Azərbaycanda həyata keçirilən enerji layihələrində bundan sonra daha fəal iştirak edəcəyini vurğulamışdır.
Yaponiya xarici işlər nazirinin birinci müavini İçiro Aisavanı bu ölkənin Azərbaycandakı səfiri Tadahiro Abe və respublika hökumətinin nümayəndələri müşayiət etmişlər.
Bölmənin digər xəbərləri
