Yaponiya yapon jurnalistin həbsinə görə Myanmaya etirazını bildirib
Tokio, 20 aprel, AZƏRTAC
Yaponiya hökuməti Yanqonda etiraz nümayişlərini işıqlandıran yapon jurnalist Yuki Kitazuminin həbsinə görə Myanmaya etirazını bildirib.
AZƏRTAC xəbər verir ki, bu barədə aprelin 20-də Tokioda keçirilən ənənəvi mətbuat konfransı zamanı Yaponiya Nazirlər Kabinetinin baş katibi Katsunobu Kato məlumat verib.
“Jurnalistin həbsdə saxlanılması bizim üçün qəbuledilməzdir. Bununla əlaqədar biz Myanma tərəfinə etirazımızı bildirmişik və onun tezliklə azad olunmasını tələb edirik”, - deyə baş katib bildirib.
Xatırladaq ki, 45 yaşlı yapon jurnalist bir gün əvvəl yaşadığı evin yaxınlığında həbs olunub, həmçinin onun evində axtarış aparılıb. Y.Kitazumi hazırda həbsxanadadır. Müstəqil jurnalist ölkədə baş verənlər barədə yalan informasiya yaymaqda günahlandırılır. Təqsirli olduğu təsdiq ediləcəyi halda, onu üç ilədək həbs cəzası gözləyir.
Qeyd edək ki, əvvəllər nüfuzlu “Nikkei” qəzetində işləyən Y.Kitazumi hazırda müstəqil jurnalist kimi fəaliyyət göstərir.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
