YAPONİYANIN NEFT ŞİRKƏTİ ABŞ-IN ETİRAZLARINA MƏHƏL QOYMUR

29.12.2005 [11:54]
Çap et
A⁺ A^-

AZƏRTAC İTAR-TASS-a istinadla xəbər verir ki, Yaponiyanın İNPEX dövlət neft şirkəti gələn il ərzində İranın Azadeqan yatağının işlənməsinə başlamağı qərara almışdır. Bu qərar Yaponiya hökumətindən İranın nüvə araşdırmaları ilə əlaqədar həmin ölkədə investisiya fəaliyyətini dayandırmağı tələb edən ABŞ-ın etirazlarına rəğmən qəbul olunmuşdur.

Lakin İNPEX-də hesab etmişlər ki, bundan sonra ləngimə konsessiyanın itirilməsinə gətirib çıxara bilər. İraqla sərhəd yaxınlığında yerləşən Azadeqan dünyada ən iri yataqlardan biridir. Onun kəşf olunmuş ehtiyatlarının həcmi 26 milyard barreldir. Azadeqanın istismarı Yaponiyaya öz konsessiyaları çərçivəsində çıxarılan neftin həcmini indiki 10 faizdən 17 faizədək artırmağa imkan verəcəkdir.

Hasilata 2008-ci ilədək başlamaq planlaşdırılır. Gözlənildiyinə görə, 2009-cu ildə hasilatın həcmi gündə 150 min barrel olacaq, 2013-cü ilədək isə 260 min barrelədək artırılacaqdır. Layihənin dəyəri 1-2 milyard dollar məbləğində qiymətləndirilir.

Yatağın 75 faizi Yaponiya tərəfinə məxsus olacaq. İNPEX onun 20 faizini xarici şirkətlərə satmaq niyyətindədir. Ən çox ehtimal edilən namizədlərdən biri Fransanın “Total” şirkətidir.

YAPONİYANIN NEFT ŞİRKƏTİ ABŞ-IN ETİRAZLARINA MƏHƏL QOYMUR

MÜƏLLİFLƏ ƏLAQƏ

Bölmənin digər xəbərləri