Yaxın Şərq: Paris və Ottava gərginliyin artması fonunda koordinasiyanı gücləndirir
Paris, 6 mart, AZƏRTAC
Fransanın Avropa və xarici işlər naziri Jan-Noel Barro kanadalı həmkarı Anita Anand ilə telefon danışığı apararaq, Yaxın Şərqdə artan gərginliyi və regionda olan vətəndaşlarının təhlükəsizliyini müzakirə edib.
AZƏRTAC xəbər verir ki, bu barədə Fransa Xarici İşlər Nazirliyi yaydığı bəyanatda məlumat verib. Görüş zamanı tərəflər regional təhlükəsizlik vəziyyətinin pisləşməsi fonunda, xüsusilə bölgədə yaşayan vətəndaşlarının təhlükəsizliyinin təmin olunması üçün sıx koordinasiyada qalmaq barədə razılığa gəliblər.
Fransa diplomatiyasının rəhbəri eyni zamanda Livandakı vəziyyətə də diqqət çəkib. O bildirib ki, Fransa ölkədə mülki əhalinin və infrastrukturların qorunmasını, eləcə də Livanın ərazi bütövlüyünə hörmət edilməsini arzulayır.
Nazirlər, həmçinin bu il Fransanın sədrliyi çərçivəsində müəyyən olunan prioritetləri də müzakirə ediblər. G7 dünyanın aparıcı inkişaf etmiş iqtisadiyyatlarını bir araya gətirən platformadır. Qrupa Almaniya, Kanada, ABŞ, Fransa, İtaliya, Yaponiya və Böyük Britaniya, həmçinin Avropa İttifaqı daxildir və beynəlxalq iqtisadi, diplomatik və təhlükəsizlik məsələlərinin koordinasiyası üçün mühüm forum hesab olunur.
Müzakirələr Kanadanın yaxın vaxtlarda İranda hökumət əleyhinə keçirilən etirazlar zamanı öz vətəndaşlarından birinin öldüyünü təsdiqləməsindən sonra baş tutub.
Bölmənin digər xəbərləri
