Noyabrın 18-də “Gülüstan” sarayında “Yeni Azərbaycan Partiyası: Azərbaycanın dünəni, bu günü və gələcəyi” mövzusunda konfrans keçirilmişdir.

YAP-ın icraçı katibi Əli Əhmədov konfransı giriş sözü ilə açaraq dedi ki, Yeni Azərbaycan Partiyasının 10 illik yubileyi ilə əlaqədar tədbirlər proqramına daxil olan konfransdan başlıca məqsəd partiyanın yaradılmasının, keçdiyi tarixi yolun və perspektivlərinin elmi təhlilindən ibarətdir.

YAP sədrinin müavini, Milli Məclisin sədri Murtuz Ələsgərov “Yeni Azərbaycan Partiyası üçüncü minilliyin partiyasıdır” mövzusunda məruzə etdi. O, dövlətimizin tarixinin çox mürəkkəb dövründə yaradılan bu ən iri siyasi təşkilatın formalaşması tarixindən danışdı. Suveren respublikanın təşəkkül tapmasının həmin mərhələsində ağır vəziyyətdə olan ölkəmiz cəmiyyətin intellektual, sosial-iqtisadi potensialını müstəqilliyin qorunub saxlanmasına yönəltməyə qadır olan müdrik, uzaqgörən siyasətçiyə ehtiyac duyurdu. Bütün bu keyfiyyətlərə və xalq arasında çox böyük hörmət və nüfuza malik olan belə siyasətçi o vaxtlar Naxçıvan Muxtar Respublikası Ali Məclisinin Heydər Əliyev idi. Azərbaycan xalqı qurtuluşa olan ümidlərini blokada vəziyyətində olan Naxçivan əhalisini xilas etmək vəzifəsini uğurla yerinə yetirən və ölkədə gedən mürəkkəb prosesləri diqqətlə izləyən Heydər Əliyevə bağlayırdı. Odur ki, ziyalıların 91 nümayəndəsi Heydər Əliyevə “Azərbaycan Sizin sözünüzü gözləyir” adlı müraciət qəbul etdi. Müraciətdə deyilirdi ki, çox böyük təcrübəyə və xalq arasında nüfuza malik siyasətçi kimi o, qısa müddətdə geniş kütlələri əhatə edəcək güclü siyasi partiya yaratmağa qadirdir. 1992-ci il noyabrın 21-də ölkənin bütün bölgələrindən 550 nəfərdən çox nümayəndə Yeni Azərbaycan Partiyasının 1-ci təsis konfransına toplaşdı. Konfransda Yeni Azərbaycan Partiyasının sədri seçilən Heydər Əliyev respublikadakı hərbi-siyasi vəziyyətin obyektiv təhlilini verdi və ölkəni o vaxtki ağır durumdan çıxarmağın konkret yollarını göstərdi.

Daha sonra Murtuz Ələsgərov partiyanın keçdiyi tarixi yoldan söz açaraq vurğuladı ki, onun liderinin şəxsi nüfuzu sayəsində indi YAP-ın 270 mindən artıq üzvü var. O, partiya sədrinin birinci müavini İlham Əliyevin Milli Olimpiya Komitəsinin prezidenti, ARDNŞ-in birinci vitse-prezidenti, Milli Məclisin AŞPA-dakı nümayəndə heyətinin rəhbəhi kimi fəaliyyətindən ətraflı danışaraq dedi ki, respublikamızın ictimaiyyəti onun partiyanın II qurultayının qətnaməsində də qeyd olunmuş xidmətlərini yüksək qiymətləndirir. Parlament seçkilərində, - bu seçkilərdə YAP-ın proporsional siyahısına İlham Əliyev başçılıq edirdi, - partiyanın uğurları, seçkiqabağı kampaniya zamanı onun qətiyyətli və məzmunlu çıxışları bu siyasətçiyə, həqiqətən, ümumxalq hörməti qazandırdı.

Qarşıdakı vəzifələrdən də bəhs edən Murtuz Ələsgərov xüsusi vurğuladı ki, Yeni Azərbaycan Partiyası gələcəyin partiyasıdır və cəmiyyətin avanqardı olacaqdır.

Sonra Yeni Azərbaycan Partiyası sədrinin müavini, əmək və əhalinin sosial müdafiəsi naziri Əli Nağıyev “Ümid körpüsündən Bakı-Ceyhana” mövzusunda məruzə etdi. O, müasir dövrün görkəmli siyasətçisi Heydər Əliyevin blokadadakı Naxçıvan Muxtar Respublikasının 350 minlik əhalisinin, sonra isə bütün Azərbaycanın xilas edilməsindən başlanmış, neft strategiyasının həyata keçirilməsinə və nəhayət, Bakı-Tbilisi-Ceyhan əsas ixrac boru kəmərinin təməlinin qoyulmasınadək keçdiyi şanlı yoldan söhbət açdı. Natiq vurğuladı ki, milli liderə hörmət və məhəbbət həm bu partiyanın üzvlərinin, həm də bütün xalqın qəlbində yaşayır.

Əli Nağıyev partiyanın perspektivləri məsələsinə toxunaraq, onun strukturlarının daha da möhkəmlənməsində gənc nəslin mühüm rol oynadığını xüsusi nəzərə çarpdıraraq dedi ki, gənclərin lideri olan İlham Əliyevin YAP sədrinin birinci müavini seçilməsi partiyanın yeniləşməsinə parlaq misaldır. Bu gün partiyanın özəyini gənclərin təşkil etməsi, onun üzvlərinin orta yaş həddinin 50-dən 40-a enməsi faktı gənclərin İlham Əliyevə böyük inamından, Yeni Azərbaycan Partiyasının gələcəyinin onun adı ilə bağlı olmasından xəbər verir.

YAP sədrinin müavini Sirus Təbrizli “Yeni Azərbaycan Partiyasını tarixi zərurət və tarixi şəxsiyyət yaratdı” mövzusunda məruzəsində ölkəmizdə bu yeni siyasi qüvvənin meydana gəlməsi zərurətinin ətraflı təhlilini verdi. O xatırlatdı ki, yarandıqdan cəmi 7 ay sonra partiyanın hakimiyyətə gəlməsinin dünyada analoqu yoxdur.

Bu misilsiz fakt onunla bağlıdır ki, partiyanın liderini, Azərbaycan Prezidenti Heydər Əliyevi əhalinin mütləq əksəriyyəti dəstəkləyirdi. Sirus Təbrizli dedi: “Heydər Əliyev fenomeni xalqımız üçün həmişə əhəmiyyətli olmuşdur, lakin indi bizim üçün daha bir amil - İlham Əliyev amili mövcuddur, ölkənin, Yeni Azərbaycan Partiyasının perspektivləri onun adı ilə bağlıdır”.

Sonra o, respublikanın siyasi həyatının müxtəlif cəhətlərinə toxundu, cəmiyyətin demokratikləşməsi proseslərindən, müxalifətin pozucu fəaliyyətindən danışaraq vurğuladı ki, müxalifət vaxtilə hakimiyyətdə olarkən qısa müddətdə ölkədə antidemokratik mühit yaratdı, Azərbaycanı vətəndaş müharibəsi həddinə gətirib çıxardı. Sosial bazasını və insanlarrın etimadını itirən bu qüvvələrin xalqın adından danışmağa mənəvi haqqı yoxdur.

Partiyanın icraçı katibi Əli Əhmədov “Yeni Azərbaycan Partiyası və Azərbaycanın siyasi gələcəyi: tarixi təcrübədən qaynaqlanan siyasi perspektiv” mövzusunda məruzəsində partiyanın perspektivləri, ideya əsasları üzərində ətraflı dayandı. O, partiyanı ölkənin gələcəyinin təminatçısı kimi səciyyələndirərək vurğuladı ki, milli dövlətçilik ideyalarının əsas parametrləri - suverenliyin və müstəqilliyin qorunub saxlanması, siyasi, iqtisadi və sosial inkişafın, vətəndaşların təhlükəsizliyinin və ictimai sabitliyin təmin olunması, hüquqi dövlət quruculuğu və vətəndaş cəmiyyəti yaradılması ölkənin ən iri siyasi təşkilatının fəaliyyətinin öncül istiqamətləridir.

Partiyanın 10 illik tarixi sübut edir ki, onun ideyaları, Proqramı xalqın istək və arzularına uyğundur. Yeni Azərbaycan Partiyasının gücünün qaynaqları Heydər Əliyev amili və partiya üzvlərinin yüksək intellektual potensialıdır. Bundan əlavə, ölkə ictimaiyyəti tərəfindən daim dəstəklənən partiya real siyasi və ictimai qüvvəyə çevrilmişdir.

Əli Əhmədov hər bir siyasi partiyanın gələcəyini müəyyənləşdirən siyasi varislik məsələsindən danışaraq vurğuladı ki, Yeni Azərbaycan Partiyasında onun liderinin siyasi xəttini davam etdirməyə qadir gənc siyasi qüvvələr var. Bu qüvvələrə partiya sədrinin birinci müavini İlham Əliyev başçılıq edir.

Məruzələrdən sonra konfrans öz işini Milli Məclis sədrinin birinci müavini Arif Rəhimzadənin rəhbərliyi ilə “Yeni Azərbaycan Partiyası və müstəqil Azərbaycan: milli və hüquqi dövlət quruculuğu strategiyası”, Milli Məclisin daimi komissiyasının sədri Zahid Qaralovun rəhbərliyi ilə “Yeni Azərbaycan Partiyasının yeni Azərbaycan konsepsiyası: ideya baxışları və liberal dəyərlər”, səhiyyə naziri Əli İnsanovun rəhbərliyi ilə “Yeni Azərbaycan Partiyası və sosial-iqtisadi islahatlar” mövzularında bölmə iclaslarında davam etdirdi.

Konfransda Prezidentin İcra Aparatının rəhbəri Ramiz Mehdiyev, baş nazirin müavinləri Əli Həsənov və Yaqub Eyyubov, Prezidentin İcra Aparatının şöbə müdirləri Əli Həsənov, Fatma Abdullazadə, Yusif Hümbətov, digər rəsmi şəxslər iştirak edirdilər.

AZƏRTAC

Foto Yaşar Xəlilovundur