YENİ AZƏRBAYCAN PARTİYASININ SIRALARINDA 359 MİN 709 NƏFƏR BİRLƏŞİR
Yeni Azərbaycan Partiyası idarə heyətinin növbəti iclası keçirilmişdir. İclasda partiyanın ötənilki fəaliyyətinə dair idarə heyətinin hesabatı dinlənilmiş, maliyyə hesabatı təsdiq edilmişdir.
Bildirilmişdir ki, hesabat ilində bələdiyyə seçkilərində namizədliyini irəli sürən YAP üzvlərinin seçki kampaniyasının təşkili Yeni Azərbaycan Partiyasının fəaliyyətinin əsas istiqamətlərindən biri olmuşdur. Aparılan uğurlu seçki kampaniyası nəticəsində 13 min 155 nəfər partiya üzvü ölkənin yerli özünüidarəetmə orqanlarında təmsil olunmaq hüququ qazanmışdır. Onlar bütün bələdiyyə üzvlərinin 65 faizini təşkil edirlər.
Ötən il partiya sıralarına 31 min 538 nəfər qəbul olunmuş və beləliklə də üzvlərin sayı 359 min 709 nəfərə çatmışdır. Partiya üzvlərinin 42 faizini (151 min 51 nəfər) qadınlar, 38,5 faizini (138 min 399 nəfər) isə gənclər təşkil edir.
2004-cü ildə partiyanın üzvlük haqlarından gəlirləri 2.318. 905.729 manat, xərcləri isə 2.030.023.749 manat olmuşdur. Partiyanın xərcləri mərkəzi və yerli təşkilatları aparatlarının saxlanması, partiya tədbirlərinin maliyyələşdirilməsi və.s məsələlərə yönəldilmişdir.
İdarə heyətinin iclasında Yeni Azərbaycan Partiyasının 2005-ci il parlament seçkilərinə hazırlıq məsələsi də müzakirə edilmiş və bu məsələ ilə bağlı partiyanın fəaliyyət proqramı təsdiq edilmişdir.
Bölmənin digər xəbərləri
