YER ELMLƏRİ BÖLMƏSİNİN 2009-CU İLDƏ ELMİ–TƏŞKİLATİ FƏALİYYƏTİNIN YEKUNLARI MÜZAKİRƏ EDİLMİŞDİR
Bakı, 24 yanvar (AZƏRTAC). Azərbaycan Milli Elmlər Akademiyası (AMEA) Yer Elmləri Bölməsinin (YEB) 2009-cu ildə elmi və elmi-təşkilati fəaliyyətinin yekunlarına həsr edilmiş hesabat yığıncağı keçirilmişdir.
YEB-in akademik-katibi, akademik Arif İsmayılzadə Prezident İlham Əliyev tərəfindən 2009-cu ildə imzalanmış Azərbaycanda elmin inkişaf strategiyasının işlənilməsini və onun reallaşması üçün dövlət proqramını nəzərdə tutan xüsusi Sərəncamın, bundan əlavə, dövlətimizin başçısının digər Sərəncamı ilə ölkədə elmin inkişafı fondunun yaradılmasının respublikanın elm aləmində ardıcıl islahatların təməlinin qoyulmasına təkan verdiyini bildirmişdir. Yaxın gələcəkdə YEB-in alimlərinin öz fəaliyyətlərini bu istiqamətə yönəldəcəyi qeyd edilmişdir. 2009-cu ildə YEB-in institutlarının elmi-tədqiqat işlərini iş planlarına daxil edilən fundamental elmi-tədqiqat, dövlət planlarının həyata keçirilməsi üzrə apardıqları vurğulanmışdır.
Bölmənin elmi müəssisə və təşkilatlarında 748 əməkdaşın fəaliyyət göstərdiyini söyləyən A.İsmayılzadə onlardan 38-nin elmlər doktoru, 172-nin isə elmlər namizədi olduğunu söyləmişdir. O, hesabat ilində bölmənin 3 ümumi yığıncağının, 11 iclasının keçirildiyini də nəzərə çarpdırmışdır.
Hesabat ilində AMEA Geologiya İnstitutunun kollektivi 7 mövzu və 17 işi əhatə edən 5 fundamental problem çərçivəsində tədqiqatlarını davam etdirmiş, elmin müxtəlif sahələrində bir sıra mühüm nəticələr əldə etmişdir.
İnstitut Massaçusets Texnoloji İnstitutu (ABŞ) ilə birlikdə Qafqaz kollizion zonasında müasir geodinamik vəziyyətin öyrənilməsi üzrə tədqiqatları davam etdirmiş, Qızılağac-Vəndam regional yarığının şərq hissəsinin dinamikasını və seysmik aktivliyini tədqiq etmək məqsədi ilə Neftçala rayonunda daimi fəaliyyətdə olan “Neftçala” adlı GPS (Qlobal Yertəyinetmə Sistemi) stansiyası qurulmuş, Şəki Regional Elmi Mərkəzində “ZLS Burris Gravimetri” kimi yüksək tezlikli aparatdan istifadə edilməklə Şəki qravitasiya stansiyası fəaliyyətə başlamışdır.
Geologiya İnstitutunun Rusiya, Qazaxıstan, Moldova və Cənubi Qafqaz respublikaları, habelə ÇXR geoloji xidmət idarələri ilə birlikdə Avrasiyanın geoloji məzmunlu atlas-xəritələrinin işlənib hazırlanmasında uğurla iştirak etdiyini söyləyən A.İsmayılzadə, hesabat ilində bu beynəlxalq layihənin II mərhələsi üzrə Rusiya və digər dövlətlərin ərazisinin, habelə qonşu dövlətlərin 1:2500000 miqyaslı geoloji məzmunlu CIS-Atlas xəritələrinin, Qafqazın (Azərbaycan hissəsi) 1:1000000 miqyaslı geoloji məzmunlu CIS-Atlas xəritələrinin tərtibi, həmçinin “Qafqaz, Krım və Karpatların geoloji quruluşu və faydalı qazıntılar” monoqrafiyasının yazılması kimi işlərin həyata keçirildiyini bildirmişdir.
2009-cu ildə AMEA Coğrafiya İnstitutunun əməkdaşları öz elmi fəaliyyətlərini 2 problem, 15 mövzu əsasında aparmışlar. “Azərbaycan Respublikası relyefinin ekogeomorfoloji xüsusiyyətləri” mövzusu əsasında Kür-Araz depressiyasında ekoloji-geomorfoloji şəraitə təsir göstərən ekzogen morfogenez proseslərin təsir dərəcəsinə görə təsnifatı aparılmış, onların yayılma arealını əks etdirən xəritə-sxem, həmçinin “Eopleystosen və Pleytosendə Kiçik Qafqazın paleoekologiyası” işi üzrə xəritələr tərtib edilmişdir.
AMEA-nın müxbir üzvləri Arif Quliyev, Ramiz Məmmədov, Pərviz Məmmədov və başqaları yığıncaqda çıxış edərək təkliflərini vermişlər.
Hesabat dövründə YEB-in fəaliyəti qənaətbəxş hesab edilmişdir.
Bölmənin digər xəbərləri
