YEXLAX NASOS STANSİYASININ TİKİNTİSİ SÜRƏTLƏ İRƏLİLƏYİR
İlk tanışlıq yaşayış düşərgəsindən başlandı. Bu, Azərbaycan ərazisindəki dörd düşərgədən (Muğan, Kürdəmir, Yevlax,Tovuz) biridir. Əsasən, bir və iki nəfərlik otaqlardan ibarət evlər hər cür şəraitlə təmin edilmişdir. Düşərgənin geniş yeməkxanası və istirahət guşəsi vardır. Burada 500 nəfərə yaxın işçi yaşayır. Yeni evlər də tikilir, çünki işçilərin sayının artırılaraq, 650 nəfərə çatdırılması nəzərdə tutulmuşdur.
CCİC şirkətinin meneceri Juan Bulos boru kəmərinin tikintisinin çox böyük uğurla və sürətlə irəlilədiyini, Yevlağa çatdığını və Tovuza tərəf istiqamətləndiyini qeyd etdi. Onun sözlərinə görə, kəmərin Səngəçal terminalından Gürcüstan sərhədinədək 12 rayondan keçən Azərbaycan hissəsinin uzunluğu 443 kilometrdir. İndiyədək görülən işlərə 130 milyon ABŞ dolları sərf olunmuşdur. Artıq kəmərin 50 faizi tam hazır vəziyyətdədir. Kəmər üçün gətirilən 39500 boru 7 bazada saxlanılır. 412 kilometr ərazidə təmizləmə işləri görülüb. Dəhlizin 325 kilometri də hazırdır, 322 kilometr boru düzülmüş, bunun 294 kilometrində borular avtomat sistemin köməyi ilə qaynaq edilmişdir.
Layihə meneceri dedi ki, kəmərin kəndlərin, çayların və magistral yolların altından keçən hissələri xüsusi texnikanın köməyi ilə quraşdırılır. Kəmər Ceyrankeçməz, Gorançay, Kürəkçay, Korçay, Gəncəçay, Qoşqarçay, Şəmkirçay çaylarının altından keçəcəkdir. Torpaq sahibləri və istifadəçilərlə şirkət arasında heç bir problem qalmamışdır. Bütün işlər cədvəl üzrə aparılır.
J.Bulos hazırda CCİC şirkətinin Azərbaycan üzrə ümumi işçi heyətinin 2241 nəfər təşkil etdiyini, onlardan 1574 nəfərin Azərbaycan vətəndaşı, 667 nəfərin isə əcnəbi olduğunu vurğuladı. O dedi ki, biz azərbaycanlıların işindən çox razıyıq. Onlar üçün mütəmadi olaraq, hərtərəfli bilik verən ixtisasartırma kursları təşkil edirik. Bundan əlavə, Azərbaycanın 199 şirkəti vasitəsilə mal-material alırıq.
Menecer CCİC-nin Azərbaycanda həyata keçirdiyi sərmayə proqramlarından da danışdı. Onun dediyinə görə, şirkət qaçqın və məcburi köçkünlərin qayğıları ilə daim yaxından maraqlanmış, onlara çadır və ərzaq paylamış, o cümlədən xəstəxanalara, uşaq evlərinə, həmçinin kəndlərdə yolların çəkilməsinə, məktəblərin texniki təchizatına yardım göstərmiş, mədəniyyət sahəsinə, o cümlədən uşaq muğam festivalına sponsorluq etmişdir. Sabirabad rayonunda məskunlaşan qaçqınlara 3 min ABŞ dolları dəyərində 7500 çadır verilmişdir. Saatlı rayonunda 200 qaçqın ailəsi üçün nəzərdə tutulan 38 evin inşası başa çatdırılmış və buna 340 min dollar xərclənmişdir. Mayın əvvəlində evlər öz sakinlərinə təhvil veriləcəkdir. İkinci mərhələdə şirkət 150 ailə üçün daha 30 ev, o cümlədən məktəb, su anbarı, elektrik stansiyası tikməyi və buna 390 min dollar vəsait qoymağı planlaşdırmışdır. İndiyədək CCİC şirkəti Azərbaycanda sosial sahənin inkişafına 1 milyon 128 min dollardan artıq vəsait xərcləmişdir.
Sonra kütləvi informasiya vasitələrinin nümayəndələri Aran qəsəbəsi yaxınlığındakı nasos stansiyasında olmuşlar. Geniş bir ərazini əhatə edən bu obyekt AzfenTekfen alyansının tikdiyi Səngəçal baş nasos stansiyasından sonra ən böyük stansiyadır. Burada artıq boru estakadalarının metal konstruksiyaları quraşdırılmışdır. Hazırda yarımstansiya, operator binası, eyni zamanda yaşayış və anbar binaları tıkilməkdədir. SpiKapakPetrofak alyansının Azərbaycan üzrə layihə meneceri Elman Qəhrəmanov indiyədək 1 milyon adamsaat işin qəzasız yerinə yetirildiyini dedi. Onun sözlərinə görə, Kürdəmirdə kəməri təmizləmək üçün qurğu da inşa olunur. Orada 160 nəfər çalışır. Hər iki sahədə 700 nəfər işçi var və onlardan 91 faiz yerli, 8,4 faizi xarici vətəndaşlardır. Bundan başqa, Aran və Yaldilli qəsəbələrindən və yaxındakı qaçqın düşərgəsindən də işçilər götürülmüşdür. Hazırda işin ən gərgin dövrüdür. Stansiyada ümumi işin 53 faizi başa çatmışdır. Tikintidə yerli inşaat materiallarından istifadə edilir. “Mərkəzi Azəri” yatağından nəql olunacaq neftin ilk mərhələsində, yəni boruya daxil olan neftin gündəlik həcmi 650 min barreldən artıq olanda, stansiya fəaliyyətə başlayacaqdır. Stansiyanın layihə gücü 95 atmosfer təzyiqə bərabərdir. E. Qəhrəmanov əlavə etdi ki, Gürcüstandakı iki nasos stansiyası dizel yanacağı, Azərbaycandakı oxşar stansiyalar isə qazla işləyəcəkdir. Yevlax nasos stansiyasının bu il sentyabrın ortalarında istifadəyə verilməsi nəzərdə tutulur.
Bölmənin digər xəbərləri
