YOŞKA FİŞER: “ALMANİYA AZƏRBAYCANDA GEDƏN DEMOKRATİKLƏŞMƏ PROSESİNDƏN RAZIDIR”
AZƏRTAC xəbər verir ki, görüşdə ikitərəfli münasibətlərin inkişaf etdirilməsi, bir sıra regional layihələrin həyata keçirilməsində birgə əməkdaşlıq, Ermənistan-Azərbaycan, Dağlıq Qarabağ münaqişəsinin həlli yolları və digər məsələlər müzakirə olunmuşdur.
Sonra hər iki nazir mətbuat nümayəndələri üçün brifinq keçirmişlər.
Azərbaycanın xarici işlər naziri Elmar Məmmədyarov demişdir ki, almaniyalı həmkarı ilə keçirdiyi təkbətək görüşdə ölkələrimiz arasında iqtisadi, siyasi, mədəni əlaqələrin inkişaf perspektivləri, Azərbaycanın Avropaya inteqrasiyası, Ermənistan-Azərbaycan, Dağlıq Qarabağ münaqişəsinin həlli yolları, terrorizmə qarşı mübarizədə birgə əməkdaşlıq və s. məsələlər müzakirə edilmişdir.
Almaniyalı jurnalistin “Türkiyə ilə Ermənistan arasında sərhədlərin açılması Dağlıq Qarabağ münaqişəsinin həllini çətinləşdirə bilərmi?” sualına nazir Elmar Məmmədyarov cavab verərək demişdir ki, Azərbaycan Prezidenti İlham Əliyev bu günlərdə Ankarada rəsmi səfərdə olarkən Türkiyənin xarici işlər naziri Abdullah Gül ilə görüşdə həmin məsələ müzakirə edilmişdir. Görüşdə xüsusi vurğulanmışdır ki, Azərbaycanın işğal altında olan əraziləri azad edilməyincə Türkiyə sərhədini Ermənistana açmayacaqdır.
Almaniyanın xarici işlər naziri Yoşka Fişer demişdir ki, azərbaycanlı həmkarı ilə görüşü çox səmərəli keçmişdir. Azərbaycanda alman dilinin tədrisi səviyyəsinin yaxşılaşdırılması bizi sevindirir. Görüşdə Ermənistan-Azərbaycan münaqişəsinə də toxunduq, hər iki dövlətin beynəlxalq ictimaiyyətin köməyi ilə problemin həllinə nail olmaq üçün ata biləcəyi addımlar ətrafında fikir mübadiləsi apardıq. Bundan başqa, NATO-nun bu yaxınlarda İstanbulda keçiriləcək zirvə toplantısı, yeni qonşuluq konsepsiyası, Azərbaycanda demokratiyanın inkişafı, insan hüquqları və mətbuat azadlığı məsələlərini də müzakirə etdik. Mən bildirdim ki, Almaniya Avropa Birliyi ilə eyni mövqedən çıxış edərək regionda sabitliyin bərqərar olmasında maraqlıdır. Almaniya Azərbaycanda demokratiyanın daha da inkişaf etdirilməsi üçün əlindən gələn köməyi etməyə hazırdır.
AZƏRTAC-ın müxbirinin “Dağlıq Qarabağ münaqişəsinin həlli ilə bağlı Almaniyanın mövqeyi necədir?” sualına cavabında Yoşka Fişer demişdir ki, biz münaqişənin mümkün qədər tez və ədalətli həllini istəyirik. Almaniya ATƏT-in Minsk qrupunun üzvlərindən biridir. Çətinliklər barədə məlumatımız var. Amma çalışırıq ki, münaqişənin Minsk qrupu çərçivəsində həllinə öz töhfəmizi verək və beynəlxalq tərəfdaş kimi əlimizdən gələni edək. Almaniya terrorizmə qarşı mübarizənin fəal iştirakçılarından biridir və təbiidir ki, bu məsələdə biz öz səylərimizi azalda bilmərik.
Azərbaycanda insan hüquqlarının müdafiəsi ilə bağlı suala cavabında almaniyalı diplomat demişdir ki, ölkəmizin Prezidenti cənab İlham Əliyev az vaxtda bir neçə əfv fərmanı imzalamışdır. Bu, çox düzgün addımdır. Eyni zamanda, Azərbaycanda mətbuat azadlığı sahəsində görülən işləri yüksək qiymətləndiririk. Ümumiyyətlə, biz Azərbaycanda gedən demokratikləşmə prosesindən razıyıq. Eləcə də Azərbaycanın Avropa Şurasına üzv olması və NATO-nun “Sülh naminə tərəfdaşlıq” proqramına qoşulması müsbət haldır. Avropa Şurasının tələblərinin Azərbaycanda yerinə yetirilməsi və aparılan iqtisadi islahatlar ölkəmizin Avropa Birliyi ilə əməkdaşlığının inkişafı üçün geniş imkanlar yaradır.
Bölmənin digər xəbərləri
